صحتك بالدنيا

عم شحاتة وزن عضمه أكتر من وزن لحمه ، ووزنه كله كده علي بعضه .. حاجة بتاعت ستين كيلو.. وعمره برضه ستين وماشي في السبعين ، بس ماشي علي مهله.وحاله علي قده، لأنه علي المعاش. وبيصرف علي تلات أولاد خاليين شغل. في يوم حس إن صحته بعافية شوية. ناس شاروا عليه يروح لدكتور باطنة. الدكتور سأله أول ما دخل: أنت سكرك إيه؟. قال له: أنا بشربها سادة من غير سكر.
الدكتور حلل له الدم و قال له: ياه. يا خبر. يا ساتر.
عم شحاتة اتفزع: إيه فيه إيه؟.
الطبيب: سكرك زيادة خالص.
شحاتة: خضتني .الله يحفظك.. دا بس من ذوقك.
الطبيب: سكرك ميتين وعشرين، ولازم تقلله لميه وخمسين. أنت بتاكل كتير؟.
شحاتة: آه . هو مش باين عليا ؟. باكل عقبال أملتك سبع طقات.
الطبيب: يا خبر دا كتير جدا. أنت مجنون؟. عشان كدا السكر هراك وخسيت. شحاتة: سبع طقات في الأسبوع يا دكتور.
الطبيب: آه فهمت يبقي أكيد عندك أنيميا.و السكر بيزيد من القلق أو الزعل ودا اللي بيخليك تخس.
شحاتة: عندك حق كله من حرقة الدم.
الطبيب: لا أوعي تزعل نفسك يا عم شحاتة .ما فيش حاجة في الدنيا تستاهل الزعل أو القلق.
شحاتة: بس أنا بقلق ع الفلوس.
الطبيب: وتقلق ليه ؟ حطها في بنك واشتري دماغك تنام مرتاح. شحاتة: قصدي قلة الفلوس. الطبيب: ولا قلة الفلوس تقلقك. الفلوس بتروح وتيجي.
شحاتة: معايا أنا بتروح بس ما بترجعش.
الطبيب: ولما صحتك تروح ...ترجع لك ازاي؟
شحاتة: بالعلاج أمال أنا جاي لك ليه؟.
الطبيب: الشفا من عند الله يا عم شحاتة. بس يكون ضميرك كويس. أسمع كلامي ما فيش أهم من صحة البني آدم . صحتك بالدنيا.كتبت لك علي قرص تاخده بعد الفطار وقرص بعد الغدا.وعايزك تمشي من دلوقتي. فاهم؟.
شحاتة: حاضر سلامو عليكم.
الطبيب: استني دفعت الفيزيتة ولا لسه؟.
شحاتة: مش حضرتك اللي قلت لي أمشي؟.
الطبيب: أيوه تمشي علي قد ما تقدر لأن المشي يخليك تحرق السعرات الحرارية وبكده تتخلص من الوزن الزايد وينشط لك الدورة الدموية ويقوي عضلاتك وأهم من دا كله يحسن حالتك النفسية والعصبية.
شحاتة: متشكر خالص يا دكتور. الفيزيتة كام؟
الطبيب: التحاليل اللي هعملها لك تكلفك 150 والكشف250 يبقوا 400 جنيه. ولما التمرجي يطلب منك حق الشاي أوعي تدي له أكتر من 40 جنيه. طلب منك قرش زيادة بلغني علي طول. ألف سلامة عليك يا عم شحاتة.
(عم شحاتة أتبط ع الكرسي فجأة وشحب وجهه وتصبب عرقا).
الطبيب: مالك؟ حصل لك إيه ؟ أوعي تفهيض في عيادتي.هتعطلني عن الزباين اللي مستنين بره ويمشوا ويسيبوني.. اتكلم يا عم شحاتة.أعمل إيه بس يا ربي؟.
شحاتة: تقيس لي الضغط يا دكتور.
الطبيب: والله فكرة. ياه. يا خبر.يا ساتر. ضغطك عالي قوي.
شحاتة: وقيس لي السكر تاني أعمل معروف يا دكتور.
الطبيب: ياه دا علي فجأة بقي 300.
شحاتة: يبقي من حرقة الدم. مش ممكن تهزهم ويبقوا ميتين بس؟
الطبيب: لا برضه غلط. ميتين كتير جدا.
شحاتة: مش كده والنبي؟
الطبيب: قلت لك أقل حاجة 150.
شحاتة: أنا بتكلم ع الكشف والتحاليل. أصل اللي في جيبي ما يكملوش مية جنيه ولسه هاركب مواصلات.
الطبيب: أنا مش لسه قايل لك دواك إنك تمشي ؟
شحاتة: رجليا مش شايلاني. مش ممكن تشيل لي مبلغ من تمن الكشف؟
الطبيب: لا مش ممكن. تجيب اللي في جيبك دلوقتي وتمشي حالا.
شحاتة: ما أنا خلاص هبدأ أمشي لآخر عمري وأوفر المواصلات.
الطبيب: (شاخطا فيه بعصبية) افهم. تمشي وما تجيش تاني غير ومعاك حق الكشف والتحاليل بالكامل.
شحاتة: طب بلاش تشخط فيا، أنا راجل كبير. شوية ذوق.
الطبيب: (بغضب) أنت هتعلمني الذوق؟. شحاتة: أستغفر الله . دا عشانك. أنا خايف عليك تحرق دمك. صحتك بالدنيا يا دكتور.
الطبيب: طب غور بقي لأحسن قسما عظما ...... ( ثم يسكت الطبيب فجأة)
شحاتة: سكت ليه يا دكتور؟. أنت زعلت مني ؟. طب أمشي أنا بقي ؟.
الطبيب: ( يسقط علي الأرض).
شحاتة: ( يفتح باب الحجرة ينادي) الحقني ياباش تمرجي.
التمرجي: إيه اللي حصل ؟.
شحاتة: تعال بص شوف الدكتور ماله. فجأة طب وقع من طوله.
التمرجي بص وقال له:عادي.. دي غيبوبة سكر. أو جلطة في المخ.
الاتنين دول بيجوا له من وقت للتاني لما يزعل. أنت عملت له إيه؟.