لحمة يا دنيا لحمة

مش عارف ابتدى منين؟
الموضوع وما فيه إن اللحمة وصل سعرها لفوق عقبال أملتك سعرها 60 جنيه.
الأسعار طالعة فى العلالى وما حدش عارف هو الغلاء عندنا بس ولا دى حالة عالمية؟
طبعا فى ناس هيخرجوا بتصريحات ويقولك دى أزمة عالمية بمعنى إنه "كاس
وداير على الكل".
على عينى وعلى راسى إن الأسعار الغالية لكن هو مفيش مرة نسمع إن فى حاجة رخصت؟
ولا بس النفوس بترخص؟
اللحمة مصدر بهجة وسعادة من الكفتة إلى الطرب إلى البوفتيك إلى ما شاء الكريم حاجة آخر منجهة.
لو بصيت لعلاقة شعبنا باللحمة هتلاقى رباط مقدس بين الطرفين يظهر فى مواقف زى :
لو واحد حصلت له حاجة فرحته وكان ربنا كارمه ومقتدر علطول يدبح
و يفرق على الغلابة.
لو واحدة عاملة "ندر" لله واتحقق لها المراد، علطول تفرق عيش ولحمة.
دى حاجة بسيطة كتبت منها على ما قسم اللى افتكرته.
بمناسبة موضوع اللحمة فى ناس شايفة إنه مش ضرورى نشترى لحمة لأن الحياة مش هتقف عندها وممكن نعوض بفراخ وسمك وكله عند الشعب بروتينات من خيرات الله وبارك العظيم فيما رزق.
فنهر النيل حتت منه مفتوحة على صرف صحى والفراخ عندها أنفلونزا بس الحالة والحمدلله مستقرة.
فيها إيه يا سيدى لو ماكلتش لحمة ولا فراخ ولا سمك وزيك زى الغلابة تقضيها فول وطعمية؟.
طيب لو بحسبة بسيطة سانودتش الفول ب"جنيه" والطعمية شرحه، تخيل بقى لو أسرة بسيطة فقيرة فى الفلوس عزيزة فى النفوس قرروا يفطروا ويتغدوا ويتعشوا فول وطعمية بجانب بقى سلاطتهم،شوف هيدفعوا قد إيه؟.
و ده أكل " فقايرى" يعنى لا "ذفر" ولا يحزنون.
سيبك بقى من اللحمة ومن الفول والطعمية وإيه رأيك لو بقيت نباتى يعنى تعيش على النباتات لا لحوم ولا حاجة؟
و منها تريح معدتك من التحمير والمسبك وتريح جيبك إلى حين نزول أسعار اللحمة إلى قواعدها سلامة.
تصدق بالله الموضوع محير، لا إحنا عارفين نشترى اللحمة ولا نقاطع الجزارين ولا نبقى نباتيين؟
طبعا اللى هيشترى ده أكيد عايش فى رغد ومترفة وعنده عربية وأملاك.
و البعض هيشترى لأن العيال نفسهم فيها وفيه هيريح دماغه ويشوف حظك اليوم وساعتها هيكون مكتوب (لحمة فى الطريق إليك).
لا تندهش فستكون اللحمة كالمفاجأة ويا خوفى يا بدران لا تقعد اللحمة تطلع بسعرها لحد ما تبقى زى جرام الدهب وساعتها لا بيوت هتتفتح ولا هيبقى فيه ستات بيوت شاطرة تعرفهم من طعم "الفتة".
نرجع لموضوعنا يا ترى تحب تعوض اللحمة بالفول والإجابة هتلاقيها فى كلام عمنا (أحمد فؤاد نجم) حيث قال:
عن موضوع الفول واللحمة صرح مصدر قال مسئول
إن الطب اتقدم جدا والدكتور محسن بيقول
إن الشعب المصرى خصوصا من مصلحته يقرش فول
حيث الفول المصرى عموما يجعل من بنى آدم غول
تأكل فخده فى ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم أضاف الدكتور محسن إن اللحمه دى سم أكيد
بتزود أوجاع المعدة وتعود على طولة الإيد
وتنيم بنى آدم وتفرقع منه المواعيد
واللى بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث إن انتو عقول العالم والعالم محتاج لعقول
ما رأى جنابك وجنابهم فيه واحد مجنون بيقول
إحنا سيبونا نموت باللحمة وانتو تعيشوا وتاكلوا الفول.
أظن مفيش بعد الكلام تتأكد من الرباط المقدس مع اللحمة، ولحمة يا دنيا لحمة.
نسيت أقولك إن بعضهم قال إن سبب ارتفاع سعر اللحمة هو إن (وديع) و(تهامى) لموا كل اللحمة اللى فى السوق عشان خاطر فيلم "لحم رخيص".