أغلى من الماس

مصر مش فريسة دى مصر قطعة ماس
فوقو يا عالم خسيسة دا ناسكو دول مش ناس
بتفجرو فى أراضيها و قلوبكم ماتت خلاص
بتموتو اللى حاميها وبتغتالوهم بالرصاص
لا انتو حاسين بيها و لا هى باقية خلاص
خيبتكم القوية بتداروا فيها بالدين
يا عالم ارهابية عليكم مش ساكتين
ركبتوا الثورة الأولى وقولتوا ثوريين
و بداية الجولة الاولى بيعتوا المصريين
روحتوا لامنا الغوله و كنتم هناك راكعين
بيعتونا و بيعتو ابونا و سلمتونا تسليم
عشموكم بالرئاسة وافقتم بكل خساسة
بالتحايل بالخباثة قعدتوا على كرسى الرئاسة
ما كفاكوش واشتغل غبائكو زى الاعمى اللى سبقكم
امنا الغولة بيكم و بيه كانت بتحكم
بس المارد المصرى قام وقف يعلمكم و يعلمهم
و الشعب كله قام بالثورة اللى من غير الوان
قلبها لونه ابيض نبضها ملأ الميدان
هزت كيان كل خسيس وجبان
و قف لوحده واتخلى عنه الأمريكان
دى مصر يا ناس مدرسة يتعلم فيها الأستاذ
شعبها دكتور فى الهندسة بيدرس علم الإنجاز
حرية ارضه الطيبة عنده اغلى من الماس
يا ثورة ام الدنيا يا ثورة حق وإعجاز
علمتى لكل الدنيا مين هو الأستاذ؟
ولو حد تانى عايز يتعلم إزاى علم الإنجاز
يقف أدام شعبك ويسلم ويبوس إيد الأستاذ