بابا نويل

31 – 12 بعد نص الليل
* مين عالباب..
افتح لعمك نويل..
* معقولة بابا نويل..
أيوة يا سيدى معقوله أنا
افتح هموت مالبرد هنا
* بس أنا حاسس إنك مش هوه
* احلف أنك الأصلى..
طب وحياة الإخوة
أنا بأصلى وفصلى
*لا لا.. عايز دليل أكبر
*ورينى زعبوطك الأحمر
آدى زعبوطى.. خلصنى
افتح يابن الحلال والنبى
بتكتك ماسقعة ياغبى
* طب ليه مش ببتكلم أجنبى
* من غير غلط جاوب وإر
* أنا لازم اكشف السر
أنا ياعم.. نويل بتاع مصر
* مش قلتلك.. يعنى مضروب
* فقستك يا حبوب
افتح بأه وبطل رخامة
فين المروءة والشهامة
الوقت وأخرى والجو تلج
ولسة راجع تانى عالمرج
* مش أنت بردو ساكن فالقطب
* واسمك برضو طنطا الكوز
لا أنت قصدك على أخويا
وبيدلعوه يقولولو يا سانتا كلوز
* أيون هوه كده بالظبط يا كبير
* طب قولى ليه أنت مش بتطير؟
أنا ابن نويل الكبير
بس إحنا مالفرع الفقير
افتحلى ربنا ما يوقعك فى ضيقه
أنا كده قولتلك كل الحقيقة
* طب قولى جايب ليا إيه؟
أنت مش شايف حالى ياباشا
أنا جاى تدينى اللى تقدر عليه
كل سنة وأنت طيب يا جميل
* حتى أنت يا بابا نويل.. أه
الظاهر أنا اللى فقرى