يوميات ناخب منحوس 3 "انتخابات 2011

في بداية سنه 2011 حصلت الأحداث اللي غيرت مصر للأبد .. 25 يناير وسقوط نظام الرئيس مبارك .. وطبعاً حل المجالس .. أيون .. طالما حل المجالس يبقى في إنتخابات .. هو ده الكلام .
كنت هموت من الفرح لما أعلن المجلس العسكري عن الإنتخابات اللي هتتعمل في الفترة الإنتقالية ..
إتجدد الأمل مرة تانية في الصوت الإنتخابي بتاعي .. معقول هنتخب تاني ؟ لا انا مش مصدق .. حد يضربني بمطوة يا جدعان عشان أصدق .. طبعاً الأيام دي كانت حلوة أوي بكل ما فيها .. وتحديداً مساحة الحرية اللي أخدناها .. واللي لسه هناخدها ..
إستنيت زي ما كل المصريين إستنوا الإنتخابات عشان أنتخب بقى بحرية وشفافية ومصداقية والجو ده .. فرصة مكناش نحلم بيها وجات لنا ..
بس حصل اللي مكنتش متوقع أبداً في حياتي .. هسافر بره .. حاجة كده من وحي الخيال .. بس أهو اللي حصل .. وفقدت الأمل في كل حاجة و في الصوت الإنتخابي بتاعي مرة تانية .. قصدي مرة رابعة .. " ما مش معقول يعني هاخد أجازة أروح أنتخب وأرجع " قولت عليه العوض ومنه العوض في الصوت .. مش مكتوب لنا ننتخب كمان المره دي .
عملوا تصويت للمصريين في الخارج.. مفاجأة من العيار التقيل و خطوة جبارة .. ومحدش كان مصدق إننا هنقدر ننتخب وإحنا برة البلد .. إذا كان أصلا مبنعرفش ننتخب وإحنا جواها .. طبعاً بوست إيدي شعر ودقن .. وإستنيت أعرف التفاصيل وإزاي هعرف أنتخب .. وقالوا انكم هتقدروا تنتخبوا عن طريق الإنترنت وموقع ولجنة إنتخابات وكلام كده ، طيب تمام .. فين برده ؟ يومين و أعلنوا عن فتح موقع " موقع الهيئة العليا للإنتخابات " اللي فيه بتعمل أبلكيشن عشان تقدر تنتخب .. وزيي زي ملايين المصريين فتحت الموقع وانا طاير من السعادة عشان هنتخب .. شكل الموقع حلو .. والناس واخده الموضوع بجد .. حاجة كده تأكدلك إنه فعلا الموضوع حقيقي .. طلب التصويت مليان أسئلة .. رجعتنا لأيام الثانوية العامة ..
مليت الأبلكيشن وجاوب بقه يا معلم ، الرقم القومي وإسم امك وجيرانك ومحطة البنزين اللي بتعدي عليها ..
المهم مليت الأبلكيشن وكل البيانات صح وتمام وزي الفل بياناتي يعني أكيد مش هغلط فيها .. ودوس يا معلم علي طلب التقديم .. وكانت الصدمة .. رسالة من الموقع بتقولي ..
خطأ في البيانات " الرقم القومي قد تم التسجيل به من قبل "
نعم ؟ رقم مين يا عم الحاج اللي تم التسجيل بيه من قبل .. ومين اللي سجل برقمي .. دا الرقمي القومي بتاعي ، اللي معايا انا بس .. تم التسجيل بيه ازاي يعني ،هو رقمي القومي ولا رقم تليفوني ،لا انتوا بتهزروا صح ؟ طب دي الكاميرا الخفية والموقع هيقولي كنا بنعمل فيك مقلب ؟ ما أصل دا مستحيل يكون بجد يعني .. لو في خطأ في البيانات فعلا يبقي ميكونش في الرقم القومي بالتحديد .. اللي بنقله من البطاقة مش بألفه ولا بتوقعه ... طب قول تشابه في الأسم .. خطأ في العنوان .. خطأ في الرمز البريدي .. حاجة كده أصدقها .. لكن تقولي الرقم القومى إتسجل بيه قبل كده .. لا دي جديدة بقي .
مكنتش مصدق طبعاً .. ولا حد صدق .. ولما قولت للناس فكروني بكدب وبهيج الناس وبعمل بلبلة .. " دا انا اللي قربت ابلبل علي نفسي " .
طبعا كنت هتشل ودماغي هتنفجر ومش عارف أعمل ايه ... حاولت مرة تانية وتالتة ورابعة ومفيش أمل هيا هيا نفس الرسالة الغبية .. طب ايه ؟ قالوا أعمل طلب شكوى .. عملت طلب شكوي للموقع مرة وإتنين عشان أتأكد إنها وصلت للمسئولين عن الموقع فعلا .. وبعد يومين بعتولى رسالة علي الايميل " شكراً علي الرسالة وهيردوا عليا في أقرب وقت " طيب ومن يومها ومحدش عبرني .
وحتى لو عبروني و ردوا وألفوا أي سبب عشان أسكت ..هيفيد بإيه بقه الرد ما قفلوا تقديم وقبول طلبات التصويت وخلاص .. وصعب يفتحوه تاني .. والإنتخابات عدت والناس إنتخبت ونجحت .
طب بس يردوا ويعرفوني ايه اللي حصل .. بدل ما دماغي تروح لأفكار تانية وسوء نية .. وده اللي أكدهولي أغلب الناس .. بس انا لسه مش مقتنع " أقتنع بقى ولا مقتنعش .. أهو الصوت راح عليا " .
وأدي كمان الإنتخابات دي عدت ومنتخبتش .
علي فكرة ده بجد .. مش خيال علمي ولا قصص سمير اللي كنا بنقراها زمان
طب إيه ؟
هو انا نحس ولا حد باصصلي فى الصوت بتاعي ولاالناس دول ادهولي من غير نفس .. ولا ايه بالظبط يا جدعان .. دا ايه الصوت الإنتخابي المنحوس ده .. معقول هستنى كمان خمس سنين عشان أنتخب ... وشكلها كمان المرة الجاية بردو هتحصل حاجة ومنتخبش .. نحس نحس يعنى ..
طب بتدهولي ليه من الأول لما مش هتقبلوه .. ولاهو الصوت ده مكتوب علي الصوت ميطلعش ، دا أصوات الشعب كلها طلعت أشمعني انا .
طب ينفع أغيره ؟ في مركز صيانة للأصوات الإنتخابية ؟ طب ينفع أعمل أي حاجة في الصوت المنحوس ده ؟ أبيعه ،أغسله أي حاجة أي حاجة
طب ينفع أأجر صوت غير البايظ ده أنتخب بيه ؟
ما أصل مش همشي الا لما تقولولي علي حل .
ما انا مش بطلب مستحيل يعني .. دا حقي .. وانا خايف أموت قبل ما أخد حقي .. وأستخدم الصوت الإنتخابي بتاعي ..
والله العظيم ما عارف أعمل ايه .. ولا دا بيحصل إزاي ، وكل ما تيجي سيرة الإنتخابات ولا المجالس .. أفتكر المسيرة الإنتخابية المنحوسة بتاعتي دي .
وأفتكر زمان لما كنت بحلم يبقالي صوت إنتخابي وأعرف أصوت .. والناس اللي كل دقيقتين طالعين ع الفضائيات يتحفونا بكلامهم عن الحرية والإنتخابات ومن حق كل مواطن يصوت .. وانا النهاردة فعلا بحقق كلامهم وتنبأتهم و بصوت .. بس مش في الإنتخابات ، لا بصوت علي حظي النحس ..
وأديني قاعد أصبر في نفسي للإنتخابات اللي جاية .. وإن شاء الله أعرف أنتخب .. مش كتير يعني 2015 بس .
أيها السادة القائمين علي الإنتخابات أو أي حاجة تخص الإنتخابات ، صناديق أو ستاير أو حبر الفسفوري أو يفت وإعلانات : أرجوكم أرجوكم أنا عايز أصوت .
يوميات ناخب منحوس 1