أسباب مختلفة لتقول "نعم": ربنا يستر

قالت البنت لأخيها: طبعا حاقول نعم
قال أخوها: نعم على إيه؟
قالت البنت: على الدستور
قال: كلّه ولاّ حتة منّه؟ حتة منّه ولاّ كله؟
قالت: إنت حاتتريق؟! الله يصبّحها بالخير سهير البابلى فى "ريا وسكينة".
قال: والنبى اللى جارى ده ألعن من عمايل ريا وسكينة.
قالت: عندك حق
قال: دكهم كانوا بيقتلوا عشان يسرقوا حتتين دهب، دول بيقتلوا عشان يسرقوا مصر والدهب والإسلام بالمرّة.
قالت: والله ما انا عارفة إيه لازمة الدستور ده!! دا ما فهيوش سيرة حتى عن البوتاجاز.
قال: إنتى قريتيه ؟
قالت: يعنى إنت اللى قريته؟
قال: لا طبعا
قالت: تعجبنى صراحتك، أمال بتتفلحس على إيه؟
قال: قال أهو زيى زيى اللى ما بيفكش الخط، إنما حاقول "نعم".
قالت: واللى ما بيفكوش الخط حا يعملوا إيه.
قال: حسب اللى حايقول لهم عليه خطيب الجمعة
قالت: يا خبر اسود، ويبقى إيه لازمة ده كله؟
قال: لا عندك ما هو دلوقتى فيه حاجة اسمها حزب "النور"، يمكن يقولّهم قولوا "نعم"
عالبركة.
قالت: يا ريت.
قال: والله أنا ابتديت أحترم حزب "النور" ده، على الله ما يكونشى بيناور.
قالت: مش يمكن حزب "النور" ده عارف الإسلام الحقيقى، وإن الله نور السماوات والأرض والحاجات الحلوة دى.
قال: والله أنا برضه ساعات باقول كدة، أصل أنا باحب الإسلام قوى.
قالت: وأنا كمان، بس باحب ربنا أكتر
قال: ودى فيها كلام؟
(2)
قالت البنت لأمها: وإنتى يا أمى؟
قالت الأم: أنا مالى؟
قالت البنت: حاتروحى ولا مش حاتروحى؟
قالت الأم: حاروح فين؟
قالت البنت: الدستور
قالت الأم: هو الدستور ده فين؟
قالت البنت: إنت بتهزرى يا أمى، حتقولى "نعم" ولا"لأه"؟
قالت الأم: هوا مين اللى مترشح؟
قالت البنت: مترشح إيه يا أمى!! دا الدستور!
قالت الأم: حاقول نعم للى مترشح ضد الإخوان وخلاص، همّا الإخوان بيقولوا إيه؟
قالت البنت: بيقولو "لأه"
قالت الأم: خلاص يبقى أنا حاقول عكسهم
قالت البنت: طب ليه يا أمى؟
قالت الأم: ما هم طلعوا أى كلام، وعمالين يخربوا فى البلد، ويموتوا فى الناس.
قالت البنت: همّا اللى بيموتوا فى الناس ؟؟؟!!
قالت الأم: أمال أنا ؟
(3)
قال الولد لأبيه: وانت بقى حضرتك حاتقول "نعم" ليه؟
قال أبوه: عشان البلد تمشى
قال الولد: وهو لو قلت "لأه" مش حاتمشى؟
قال أبوه: طبعا مش حاتمشى، خد عندك لجنة خمسين فى خمسين فى خمسميّة، وحِلّنى.
قال الولد: صحيح البلد ما عدتشى مستحملة خمسينات.
قال أبوه: ربنا يستر
قال الولد: كدا ربنا يستر، وكدا ربنا يستر
(4)
دخلت عليهما البنت وقالت:الله نور، أى والله! ربنا يستر.