"أميرة" اتلسعت فى الخطوبة فبتتعلم مع خطيبها ازاى يرقصوا قبل الفرح.. و"إيمان" ووصيفاتها قدموا "شو" للمعازيم.. ومدرب رقص: تصميم الرقصة بيتوقف على مساحة القاعة وفستان العروسة وكعب حذائها

يديه تلف وسطها فى ارتباك بينما تتشبث فى رقبته، ويتمايلان ببطء قدر الإمكان على إيقاع الموسيقى الهادئ؛ حتى ينتهيان من رقصتهما الأولى بسلام، من دون حوادث من قبيل أن تُدهس قدمه بكعب حذائها العالى أو تتعثر فى ذيل فستانها.. مشهد تقليدى نراه فى كافة حفلات الزفاف، فيما عدا التى قرر أصحابها أن يكسروا التابلوهات التقليدية، ويكونون على مستوى الحدث عن طريق "درس خصوصى" يعلمهما كيفية الرقص بطريقة احترافية فى زفافهما.
اللى اتلسع فى الخطوبة يتعلم إزاى يرقص قبل الفرح.. هذا هو السبب الذى دفع الثنائى أميرة عسل وخطيبها إسلام فودة أن يتلقيا دروساً فى الرقص قبل زفافهما، وتوضح"أميرة" أسباب إقبالها على هذه الخطوة" مش حابة أكون تقليدية فى فرحى، حابة الرقصة الأولى تكون سالسا أو تانجو، خصوصا أن خطوبتنا كانت مسخرة لأننا مكناش عارفين نرقص والناس بتضحك علينا".
أميرة بحثت على شبكة الإنترنت حتى وجدت مرادها، لقيت مكان متخصص فى تعليم الرقص، وفيه كورس خاص للرقصة الأولى بيكون قبل الفرح بشهرين تحت إشراف مدرب خاص بنختار الأغنية اللى عاوزينها وهو يعلمنا الحركات عشان نرقص فى الفرح زى المحترفين".
تحلم العروسة العشرينية بأن تتعلم الرقصة التى شاهدتها فى برنامج "so you think you can dance" وتؤكد تحمس خطيبها للفكرة فور عرضها عليه:" أول ما قلت له الفكرة اتبسط جدا، لأنه مبيعرفش يرقص خالص، وأنا وهو فشلنا فشل ذريع فى الرقص فى خطوبتنا فقررنا ننفذ الفكرة فورا وحجزنا وهنبدأ خلال أيام التمرينات".
رغم أن تلقى دروس الرقص قبل الزفاف أصبح موضة إلا أنها مقتصرة على شريحة معينة، والسبب "الموضوع فيه جزء من الرفاهية ومش فى متناول كل الناس لأن ممكن الألفين جنيه اللى هيدفعوهم فى تعلم الرقص يكونوا محتاجينهم فى حاجة تانية أهم".
بينما تنتظر أميرة وخطيبها زفافهما بفارغ الصبر لإبهار ضيوفهم، نجح "شادى" و"إيمان" فى تقديم شو جذاب فى حفلة زفافهم كما تؤكد"منة أحمد" صديقة العروسة التى حضرت معها دروس الرقص:" بما إننا كنا وصيفات العروسة فكرنا نعمل رقصة افتتاحية للفرح واتفقنا مع مدرب رقص يعلمنا رقصة مشتركة مع العروسة والعريس، وبدأنا تدريبات قبل الفرح بشهر".
الدرس الجماعى كان عبارة عن تمارين رياضية فى البداية كنوع من "التسخين" كما تقول صديقة العروسة " اختارنا بعد كده أغنية tonight" "، وبدأ المدرب يعلمنا حركات متناسقة معها".
وتتذكر "منة" اللحظة التى تعثرت فيها "إيمان" العروسة فى بداية الرقصة" حاولنا نتصرف بشكل سريع وقربنا عليها فى شكل دائرة وأخفيناها وسطنا وإحنا بنلف حولها لحد ما استعادت توازنها ووقفت فرجعنا تانى وسعنا الدائرة وكأن الحركة دى كانت جزء من الرقصة ومحدش خد باله وعديت على خير".
أما رضا محمود، مدرب الرقص الخاص فى استوديو 2d2، فيقول لليوم السابع أن تعلم الرقصة الأولى أصبح موضة حفلات الزفاف هذه الأيام، ويشرح كيف يكون الدرس:" فى البداية بسمعهم أنواع موسيقى مختلفة زى سالسا وتشاتشا ورومبا وتانجو لحد ما يوصلوا للأغنية اللى تعجبهم، وفيه بيكونوا جايين ومحددين هدفهم ومش شرط تكون موسيقى غربى فيه كابلز بيتعلموا رقصة هندى أو لاتينى".
الخطوة التالية هى "تصميم الرقصة بيتوقف على باقى تفاصيل الفرح زى مساحة القاعة وفستان العروسة وكعب حذائها، لأن كلها أمور بتحدد الحركات اللى ممكن تقوم بيها، وبعد كده فترة الدروس بتتوقف على سرعة الاستجابة فممكن تبقى أسبوعين أو شهرين".