جمالك بالألوان مع جيلان.. أحدث موضة في السواريهات

قدَّمت لكم قبل كده حلقة عن فساتين الزفاف، واتكلّمنا عن أحدث خطوط الموضة في الفساتين والميك أب ولفات الطرح..
النهارده حلقتنا هتكون عن فساتين الخطوبة والسواريهات؛ لأن أي بنت في خطوبتها بتكون عايزة تظهر في أحسن شكل؛ لكنها بتحتار في اختيار لون الفستان...
ودلوقتي هنعرف إيه الألوان الموضة في الفساتين السواريه وكمان في الميك أب...
* موضة الألوان في سواريهات 2010
الألوان الموضة السنة دي هي الموف والفوشيا وكمان الفضي والذهبي لسه مكملين معانا من السنة اللي فاتت، واللون الأحمر كمان لون مميز جداً السنة دي، وممكن تلبسيه لو عايزة تظهري بشكل مختلف يوم خطوبتك.
* فستان فوشيا.. لعروسة متألّقة
دلوقتي هنشوف الموديل لابسة فستان فوشيا في فضي، والفستان كله مزيّن بالفصوص والإستراس، وهو كله مقفول وعليه درابيهات بالعرض، والاستايل ده بيرفّع، وبيدي شكل للجسم أنْحَف؛ لأن الخطوط المتداخلة مع بعض دي بتشد العين.
والفستان من تحت نازل بقَصّة السمكة، وخامته عبارة عن ساتان في تل، وكُم الفستان نازل زي كُم البادي، ومن تحت نازل على منفوش.
في ربطة الطرحة، استخدمت نفس الخامات والألوان، وطبعاً اهتميت إن الطرحة ما يكونش فيها شغل كتير أوي؛ لأن الفستان فيه شغل كتير، والطرحة لازم تكون طويلة علشان يبقى شكلك مختلف عن باقي البنات الموجودة في الحفلة؛ لأن كلكم بتكونوا لابسين فساتين ملوّنة.
أما بقى بالنسبة للميك أب فركّزت على العين أكتر، واستخدمت الرموش الصناعية، واخترت الروج بلون فوشيا قريب من درجة الفستان، وزي ما هنشوف في الفيديو، اللون لايق مع الموديل؛ لأن بشرتها فاتحة.
وطبعاً البشرة السمراء بيليق عليها اللون ده، لكن كل بشرة ولها درجة اللون اللي تناسبها أكتر، وفي النهاية عينيكي هي اللي بتحدد الدرجة المناسبة معاكي.

إضغط لمشاهدة الفيديو:

* فستان روماني.. لمظهر ملائكي
دلوقتي هنشوف فستان روماني، والاستايل ده أنا بحبه أوي؛ لأن شكله رقيق وتصميمه بسيط جداً، وهو معتمد على الدرابيهات والشيفونات، وكمان مناسب مع الحجاب؛ لأن كُمّه واسع، والفستان لون أوف وايت واللون ده موضة جداً السنة دي، وميزته إنه بيدّي شكل ملائكي للعروسة.
وعملت ربطة الطرحة بنفس الخامات والألوان، والربطة دي بتليق جداً مع الوش الطويل؛ لأني أنا عاملة فيها حجم شوية علشان تدي امتلاء للوش، وكمان ضفت سلاسل كإكسسوار من على الجنب، واعتمدت كمان على التل والشيفون بنفس درجات الفستان.
أما الميك أب؛ فأنا اهتميت إنه يبقى بسيط وهادي جداً، واعتمدت على درجات زي البني والأوكسيديه.

إضغط لمشاهدة الفيديو:
وبكده يكون خلص عددنا النهارده..
وأتمنّى إن الموديلات اللي قدّمناها تكون عجبتكم..
وإن شاء الله كل عروسة تكون زي القمر يوم فرحها..
بس أهم حاجة إن العروسة تختار المناسب لها وبلاش تجري ورا الموضة..