زى ما ربى خلقْها.. مش ألاعيب أمريكانى

من أغانى قديمة كتبتُها للأطفال داخلنا وخارجنا: منذ حوالى عشر سنوات.
-1-
جيت أشوفها فى الكبار قمت اترعبتْ
الحكاية بايظة خالص، ... قَومْ سِكِتّ
كل حاجه غامضَةْ داخله فْ بعضها
واللى ماسك دفة المركب باينّه
فى العسل نايم ولاهوش قدّها
يعنى نيأس؟!!
قلت لأه، مهما حاولوا يخرّبوها
يبقى نلجأ للى بكره حايعملوها:
شفتها فيهم بسيطة:
يعنى واضحة، بايْنَهّ واصْلة لْوَحدَهَا
أعمل إيهْ؟
قلت أقولْها للعيالْ وعلى الله تنفعْ
للكبير برضُه ما هى يِمْكِن تِسمَّعْ:
-2-
نِفْسى أبقى بسيطْ وأوْضحْ
نِفْسى إن الكلمهْ تنجحْ
نفسى أحافظ عالأملْ
والكلام الحلو يبقى حلو، لمّا يتعَمَلْ
هيَّا ورطةْ للكبير زى الصغيَّرْ
ياللا يا ابنى قبل ما بَلْوِتْنا تكبْر
(* ماهى كْبرتْ واللى كان دا بايِنّه كانْ!)
=لأَّهْ، داحنا قدّها، وأنتمْ كمانْ.
......
= العيال واخدينها جَدّ
ماباينْشِى الحارهْ سدّ
إحَنا ليه بِنْسدّها بَدْرى عليهُمْ؟!
- أصلنا خايفين نشوفها بى عِينيهمْ
قومْ نراجعْ نفسنا !
(= لأْ ياعمْ، راجع إنتَا بالنيابةْ عننَّا)
(أنا مش نأوى أخطىِّ مِنْ هنا)
- طب نِسيبْهُمْ هُمَّا يمكن يعملوها
(= لأَّه برضه، هيّا سايبه؟!
ما إحنا عارفين اللّى فيها.)
-3-
- همّا يعنى لسه راحْ يستَنّوا إذْنَكْ
همّا طايحين بالسلامه غصب عنىّ، آه، وعنّكْ.
العيال لازم يِعَدُّوا
كل واحد على قدّو
كلهّ بِيْحُطّ اللى عندُه
البُنَا يطلع لوحْدُه
طوبهْ منّك، طوبه منِّى
نبنى اللى مستحيل حد يِهِدّه
بابه مفتوح لهْ تعالَى، طب ومين يقدر يسدُّه؟!!
العيال راح يعملوها واللى خَلَقَكْ
العيال جُوَّانا برضَك
زىْ عندى زى عندك
يعملوا بكره وبعده
مِالنَّهارده الحلو برضه
لو نحطُّهْ عَالَى بعضه
(* يعنى قصدك: يعنى إيه؟
كل ده بِتْرصُّه ليه؟)
- قصدى يعنى إنه حتى لو الكبير قفِّّلْ وطنّشْ
العيال راح يعملوها
(* ........ لأ ما أظُنِّشْ.)
- لأ تُظُن ونُصْ
بسّ حِسّ وبُصْ
-4-
راح تشوفها شكل تانى
زى ما ربى خلقها مش ألاعيب أمريكانى
(*هيّا إيه؟)
- الحياة
(*يعنى إيه؟)
الحياة هيّا الحياة
أغلى حاجه فيها هيّا: إنى عايش، وِسْط ناسْنا الطيبين
حتى ناسْنا النُصْ نُصْ، همّا برضهْ، أحلى ناسْ: طيبين
ما أنا منهمْ، يبقى لازم زيُّهمْ، حلو خالصْ
بس أنا برضه بَلاقينِى ساعات كدا نُصْ نُصْ
قلت أتعلِّم، وأبُصْ:
-5-
الحياة الحلوة :حلوةْ،
حتى لو مُرّة وتْتأَمِّل شويه، راح تشوف مرارتها حلوةْ
الحياة مش هيصهْ سايبة منعكشهْ
الحياة حركة جميلةْ مُدهِشَة
بس بتخوّف ساعاتْ
لمّا بنعرِّى الحاجاتْ.
-6-
باترعب من خطوتى الجايّة، ولكنْ
با ترعب أكتر لو انّى فضلت ساكنْ.
كل ما بالْقانِى ماشى: ما بَنَاتْكُمْ،أنبِسطْ.
إيدى ماسكه فى إيديُكمْ
بابقى خايف إن واحد ينفرطْ
-7-
يا حلاوا لو تكون الدنيا ديَّهْ
زى ما ربى خَلَقْناَ: هِيَّا هيهْ،
تيجى رايح نحوها، تلقاها جايَّه
-8-
الحياة الحلوة تِحلى بْكُلّنا، إنتَ وأنَا
كل واحدْ فينا هوّا بعضنا
بس مش داخلين فى بعض وهربانين،
زى كتلةْ قَشّ ضايعةْ فْ بحر طينْ.
كل واحد هوّا نفسُه
بس نفسُهْ : هِيّا برضه كلنا
مالى وعيه بربنا