نوارة نجم: د.صفوت حجازي كلمني

موجة انتقادات حادة على مواقع التواصل الاجتماعي أثارتها تصريحات الشيخ صفوت حجازي في مقطع صوتي تم نشره على الإنترنت، بشأن “شقة العجوزة” والتي قال فيها: إن 6 من شباب الثورة تركوا ميدان التحرير ليلة موقعة الجمل ولجئوا إلى شقة في العجوزة ليقضوا ليلة (خمر ونساء)، بعد أن أصابهم اليأس وفقدوا الأمل في إسقاط النظام،
حسب ما قاله الداعية الإسلامي في مؤتمر “مصر الانتصار” الذي عقده حزب الحرية والعدالة مساء الجمعة 7 أكتوبر في الإسكندرية، للاحتفال بمناسبة نصر أكتوبر. وأضاف حجازي، في تصريحاته بهذا الشأن: “كثير ممن يظهرون في التليفزيون ويتهمون الإسلاميين بأنهم (ركبوا الثورة)، هؤلاء الشباب منهم 6 شباب أذكّرهم ب”شقة العجوزة”، وأقول لهم: “لو مابطلتوش النغمة دي هنتكلم ونقول إيه هي قصة شقة العجوزة”.
وأضاف: “لولا شباب الدعوة لضاعت الثورة وقتها”.
وتروي نوارة نجم المحادثة التلفونية التي جرت بينها وبين د. صفوت حجازي فتقول:
صحيت الصبح لقيت تليفون من الدكتور صفوت حجازي والمكالمة كانت بخصوص التصريحات بتاعته
انا هانقل لكم المكالمة زي ما هي، هو قالي:
ص: بصي يا نوارة انا باتشتم ليل نهار ومش بيهمني وفيه ناس قليلة تهمني انت منهم عشان كده كلمتك، الموضوع اللي انا قلته ده معروف لكل الناس هو انت مش عارفاه؟
ن: لا يا دكتور مش عارفاه ومش عايزة اعرفه.. وانا شايفة ان الكلام ده ما يتقليش بقيمتك ومش موفق.
ص: انا عارف اني غلطت اني قلت كده، وعارف انه كلام مش موفق، بس انا تعبت، انا مش باقعد في البيت، ومش عايز حاجة من حد، ومش هاترشح، ولا هاقبل مناصب، وعايز لما الثورة دي تخلص اروح اقعد في المدينة المنورة واريح دماغي.
انا بقيت متهيالي اني ارمي التليفون ده، فيه مجموعة معينة ما وراهش غيري، ووصل الامر انهم يقدموا فيها محاضر وبلاغات كاذبة ان صفوت حجازي تعدى علينا بالضرب، وانا العيال دي عارفها بالاسم، وعارف هم ايه؟
وعارف الأحزاب اللي بتاخد فلوس من الجيش، وقلت ان فيه أحزاب بتاخد فلوس من الجيش في نفس الندوة دي وماحدش بروز الكلام ده، ولا حد قال اني قلت اننا مش حنقبل حاكم عسكري لمصر، كل اللي بروزوه الكلام التاني اللي قلته.
انتي ما تتخيليش الضغط على اعصابي عامل أزاي، واتهامات على طول، وتخوين على طول، وانا عندي بيت وأسرة وبناتي بيعيطوا لما بيشوفوا الكلام ده عن أبوهم.
ويجنني بقى لما الاقي الكلام ده من ناس انا عارفهم، وعمري ما هاقول أسماءهم بس انا عارفهم وعارف هم ايه؟
ويوم 8 ابريل وقعوني وكان هدفهم الاغتيال، ويوم صلاة العيد تعدوا عليا، وعلى طول يطلعوا في الإعلام ما وراهمش غير صفوت حجازي، هو صفوت حجازي ده مش بني ادم؟ ما بيحسش؟ ما بيغلطش؟
أنا باحاول اعمل اللي اقدر عليه لله وللبلد ومش عايز حاجة ومش عايز حاجة ومش ناوي اقبل اي مكافئات دنيوية، بس انا بشر، وليه التصيد اللي على طول ده؟
وليه لما اقول حاجة كويسة تتخفي والإعلام ما يركزش عليها، ولما أغلط تنزل مانشيت؟ وكوني غلطت اتشنق يعني؟ طب هم ياما خاضوا في عرضي وقالوا عني كلام سافل كتير.. هه.. ماحدش اتكلم ليه ولا قال حاجة ولا دافع عني؟
وتعلق نواره نجم علي المكالمة وتقول:
بصوا بقى... انا فاهمة تماما اللي هو بيقوله.. تماما
وفاهمة الضغط النفسي اللي واقع عليه، وفاهمة إحساسه بصراحة، وفاهمة يعني ايه الواحد يبقى طالع تلاتينه في الحياة ويلاقي عيال رمم وزبالة عمالة تزايد عليه.
وأنا بصراحة عمري ما كلمت صفوت حجازي على غفلة ولقيته في بيتهم ابدا، وعمري ما رحت في حته ولا كلمت مصاب ولا محبوس ولا منكوب ولا أبو شهيد إلا ولقيته وهو بيشتكيلي ويقول لي: والله لولا صفوت حجازي كان زمانا مش لاقيين ناكل..والله صفوت حجازي اللي جاب لنا المحامي، والله صفوت حجازي هو اللي دخلني المستشفى.
دي شهادة لوجه الله واللي مش مصدقني ينزل بنفسه يروح للمصابين ويجيب قدامهم سيرة صفوت حجازي، ولا يروح يزور اللي مقبوض عليهم في المحاكمات العسكرية ويجيب سيرته، حتى الناس اللي هو مش موافق على مواقفهم زي ظباط 8 ابريل، بيروح لهم برضه.
ايه بقى اللي بيخلي الناس تبقى عدوانية عليه؟ ان ناس تانية برضه بتعمل شغل ومجهود ويفضلوا يقولوا لي: يعني هو ماحدش انضرب في الميدان غيره؟ هو ماحدش وقف مع المحابيس غيره؟ هو ماحدش وقف مع المصابين غيره؟ ماحدش ماسك ملف الشهدا غيره؟
لا فيه ناس كتير عملت حاجات غيره.. بس هو اللي بيتشتم مش هم، منى سيف ومالك عدلي واحمد سيف واحمد حلمي وغيرهم بيعملوا حاجات كتير للمقبوض عليهم والمصابين واهالي الشهداء، بس ما سمعتش حد بيشتمهم، ولما بتيجي سيرتهم بيشكروهم، ناس كتير كانت حتموت في الميدان، ومالك مصطفى مثلا انا برضه كنت باشوفه على طول وهو اول ما يشوف ضرب يجري عليه، يشوف رصاص يجري عليه، بس ماحدش بيشتم مالك مصطفى
بطلوا تشتموه وانا ابطل ادافع عنه
بطلوا تشتموه وهو يبطل يقول تصريحات مرة تصيب ومرة تخيب
وانا فاهمة والله يعني ايه الواحد يتعب ويزهق ويحس انه بيحفر في بحر وانه بيتعامل مع اشكال قليلة الاصل لحد ما يغلط غصب عنه، فاهماها تماما.
اذا كنت انا الفسلة اللي ما باعملش نص اللي هو بيعمله بابقى عايزة اولع في الناس ومرة اتخانقت مع واحد كاتب على التويتر: انا في المسيرة ومش شايف نوارة
قلت له: ونوارة مش نازلة تاني خالص بقى.. لك عندها حاجة؟ انت مش ابويا عشان تفتش عليا.. هو انا الدادا بتاعتكم؟ اشمعنى انا اللي باتعامل كده؟ اقعد في الاعتصام في الصينية يقولوا طالعة تتصور، اخش الخيمة يقولوا هي جاية تعتصم ولا تنام في الخيمة، اكنس الميدان يقولوا بتستعرض، اسيب ام المقشة واقعد يقولوا فاكرة نفسها اميرة ومشهورة وهي تقعد والناس تخدم عليها، وتنزلوا المسيرات تدوروا عليا؟
انتوا نازلين المسيرة عشان حاجة مقتنعين بيها ولا عشان تفتشوا عليا وتشوفني نزلت ولا لا؟ اشمعنى ماحدش بيدور على بلال، ولا على ابراهيم عيسى، ولا على الحملاوي، ولا على رشا عزب، ويوم ماحد يشوفهم يبقى كتر خيرهم انهم نزلوا، وانا كنت الخدامة يعني ولا ايه مش فاهمة؟
والناس قعدت تقولي: معلش يا نوارة ما يقصدش.. ده من العشم.. وانا برضه غلطت نفسي اني اتكلمت كده، هو ما قالش حاجة لده كله.. الجدع بيدور عليا محبة يعني.. بس الضغط العصبي بيخلي الواحد اعصابه تفلت
وبمناسبة بقى بلال وإبراهيم عيسى، اول ما يختلفوا معاكم يبقى بلال وابراهيم عيسى باعوا نفسهم.... انا زهقت على فكرة
زهقت قوي.. زهقت من قلة الأصل والمزايدة واللي يوضيكم زي اللي ينجسكم.. بلال وابراهيم ايه اللي حيبيعوا نفسهم؟ ايش حال ما شفتهم سنة 98 وهم بيتقاسموا سندوتشات الطعمية وبيرموا على بعض حساب القهوة زي فيلم المنسي لما عادل امام قال لاحمد ادم: انا جبت لامك ازازة زيت الاسبوع اللي فات حاسب انت حساب القهوة بقى... وكان جرنالهم مقفول وطالع عينهم ومش لاقيين يدفعوا الايجار ولو كانوا قالوا يا بيع ساعتها كانوا لقوا الف شاري.. ما عملوهاش وهم مش لاقيين ياكلوا حيعملوها دلوقت؟ وهو كل عيل أهطل نزله يومين افتكر نفسه صلاح الدين الأيوبي وحيفضل يزايد على أم الناس وينصب لهم محكمة؟
خلاص.. صفوت حجازي قال تصريحات مش موفقة من كتر الضغط وهو حاسس انه غلط... ندبحه على العيد؟ ندبحه على العيد وننسى ان رأسه كانت مفتوحة في الميدان وما رضيش يخيطها ولبس عليها حلة وراح وقف تحت تمثال عبد المنعم رياض يشاور للقناصة عشان يضربوا عليه.
هو لوحده اللي عمل كده؟
لا مش هو لوحده اللي عمل كده... بس هو لوحده اللي مشهور ومعروف وشجاعته في الإقدام على الموت شجعت شباب كتير من اللي بيثقوا فيه.. وهو لوحده من ضمن المشاهير اللي ما كانش بيرضى ان "مريديه" يحاوطوه ويعملوا له بودي جارد زي ما بنشوف مع بقية المشاهير، وكان بيزقهم ويجري على الضرب وده كان بيشجع شباب تاني، يعني اخد ثواب نفسه وثواب غيره من الشباب اللي بيحبه واتشجع لما لقاه بيعمل كده، وهو لوحده من المشاهير اللي كان بيتخانق مع الناس اللي بتقوله: خليك انت يا دكتور صفوت ورا، ويمكن أول مرة يشتم قال: ينعل ابو الشهرة انسوني سيبوني ماحدش له دعوة بيا.
التصريحات اللي قالها دي غلط، وما يلقشي انه يقولها، وبتحط ناس كتير ابرياء في دائرة الاتهام، وهو قالها بسبب الضغط العصبي اللي عليه وانا بصراحة فاهمة قوي موضوع الضغط العصبي، الشهادة لله انتوا تكرهوا الواحد في عيشته وتندموه على انه عمل خير في حياته.
ولو تعرفوا في القعدات الخاصة فيه ناس وصل بيها الأمر إنها تقول: والله مبارك كان معذور.. ده ايه القرف ده؟
ولا فيه ام تمييز وبالظبط بالظبط اللي يوضيكم زي اللي ينجسكم، واللي ما بيعملش حاجة غير الرغي الفارغ وتفريق الصفوف واحنا عارفين عنهم حاجات مش عايزين نقولها تعملوهم عجل ابيس وتقدسوهم وإياك حد يتني لهم كلمة، واياك حد ينتقد اي حاجة بيقولوها، وعمالين تألهوهم واحنا عارفين دواخلهم وعارفين اتصالاتهم بالجيش وعارفين ألاعيبهم واتصالاتهم بالسفارات كمان ومش عايزين نتكلم، وعشان ما بنتكلمش انتوا عاملينهم آلهة وماحدش يقدر يقول عنهم حاجة مع ان مواقفهم باينة، وتمشوا وراهم وورا طراشهم ولما يعكوا الدنيا تختلقوا لهم اعذار.. مع ان ابسط حاجة الناس دي قاعدين في بيوتهم يعني عمرنا ما شفنا لهم نزلة ولا بهدلة ولا نيلة، وهرابين من المواجهة كمان... واللي يتفانى بجد ووارد انه يقع في الغلط زي اي انسان تطلعوا ميتين اهله لما حاجة بقت تقلب البطن.. ماهو طبيعي اللي ما بيعملش حاجة ما بيغلطش واللي بيعمل عشرين حاجة وارد انه خمس حاجات تفلت منه... ايه؟
وطبيعي انه لو بيعمل عشرين حاجة تتفق معاه في تلاتاشر حاجة وسبع حاجات تختلف معاه فيهم، تسيب التلاتاشر حاجة وتمسك في السبع حاجات وتخونه كمان عشان مش متفق معاك؟
بس ده حال الدنيا.. حنعمل ايه؟ الصبر.. الصبر
هم يعني الناس اللي بتشتم دي احسن من سيدنا علي اللي قالوا له: انت على الحق، تقبل حلول وسط ليه؟ انت كافر.. يالا توب بقى وادخل الإسلام
ما هو التاريخ فيه الفئة الباغية اللي كسبت الدنيا.. واللي اعتزلو وقعدوا مالهمش اي تلاتين لازمة في الحياة غير يرغوا وطبعا كفوا نفسهم شر الناس وما حدش أتعرض لهم لأنهم حزب كنبة.. والفئة اللي على الحق ودي الفئة الوحيدة اللي اتشتموا وكل واحد فيهم مات مقتول
هو ربنا عايز كده.
بس برضه نتعلم من سيدنا علي.. صحيح ماحدش فينا زيه مهما حاولنا، وبرضه البني ادمين ضعفا، بس هو اتشتم على المنابر واتكفر واتقال عليه كلام اوحش من ده كله وما وقعش نفسه في الغلط وقبل ما يتكلم كان بيحسب كل حرف طالع منه.. نحاول على قد ما نقدر، وده اللي انا قلته للدكتور صفوت، يحاول على قد ما يقدر انه يمسك نفسه، ولو لقى نفسه مرهق قوي يرتاح 48 ساعة بس.. ده ما بيهمدش خالص.. خالص.. ده زمان مراته وعياله بيدعوا على الثورة دي، والضغط ده والارهاق ده هو اللي وقعه في الغلط.. هو مش عيل صغير على البهدلة دي وكمان قلة أدب
وانا مش هاشهد شهادة زور عشان أعوم على عوم الناس وأراضيهم على حساب الحق، ومش هامسح مساهمات بني ادم وبطولاته عشان قال تصريحات غلط.
الغلط يتقال عليه غلط بمعزل عن تشويه الشخص، وهو معترف انه كان غلط يقول كده، الكلام ينفع يعتذر عنه والموضوع ده يتقفل ويتحرم استخدام الاسلوب ده في الكلام خالص بينا وبين بعض، لكن الأفعال ما تتنسيش
وقبل ما اي عيل خايب في الحساب يقول لي ما مبارك عمل الطلعة الجوية نسامحه؟
والله لو مبارك أخطاؤه على قد الكلام بس كنا سامحناه، لكن خطيئته تعدت القول الى الفعل وقتل ناس وبقى فيه دم أبرياء، ثم ان مبارك كان في موقع مسئولية ورئيس.
صفوت حجازي لا رئيس ولا وزير ولا حتى مدير البوفيه
والناس اللي قاعدة ما ورهاش غير تدور ورا خلق الله.. والله لو فكروا يعملوا اي حاجة مفيدة في حياتهم مش حيبقى عندهم وقت يشتموا الناس.
ومدام جبنا سيرة سيدنا علي بقى، احب افكركم ان الخوارج كانوا ثوار، وثوار انقياء كمان، وكانوا بيدوروا على الحق، وكانوا راديكاليين، وانتهى بيهم الامر انهم كفروا سيدنا علي وولاده.. واللي شتموا سيدنا ابو بكر وسيدنا عمر برضه كانوا ثوار، وانقياء، وبسبب اختلاف في المواقف السياسية مسحوا 23 سنة من الكفاح والبهدلة والتضحيات وقرروا انهم ناس وحشة عشان موقف واحد.
البني ادم ما يسارعش لفتح جاعورته كده.. كل واحد وارد انه يغلط، ومدام مش بيكابر في الغلط يبقى الموقف انتهى.
الوسط