"سلك عريان جنب حيطة ذكرى ماشالتش الجميل" قصيدة لأشرف الشافعى

أنا مش ها اسلم دهشتى
للعند ويا الزهر ..
وكوبايات الشاى وقراية الجرانين
ولبياعين الفل ف الإشارات
ومش ها ابيع سكر برائتى ..
للمرارة اللى ف عيون الأتوبيسات
ولخنقة الدنيا اللى عايزانى ابقى كهل ..
ف أول الحكايات
مش ها ادى فرصة للمطر يشمت ..
و يتراهن عليا ويفتكر ..
إنى هاخاف واتدارى تحت البالكونات
ومش ها اتقّل ف الهدوم وانا نازل الشارع
من حقى أحس بخفة الروح اللى غاوية ..
شعبطة ف التورمايات
انا مش ها اسيب شوقى العبيط ..
ياخدنى تانى لأمسيات الشعر و"التجارية " ..
ومشية الكورنيش
ووشوش فشلت أشوفها غير أشباه صحاب
مش مستعد أسمع قصايد عن وجع ..
عمره ماكان موجود
لا انا عايز ارجع تانى لعلاج الصداع ..
ولا حِمل زيارات متعبة لدكاترة نفسيين
علشان اصالح نفسى على حبة عيوب ..
أدمنتها ..
من يوم ماشقر شوفى ع الناس والوجود
انا مش ها اورط روحى والمس ...
سلك عريان جنب حيطة ذكرى ماشالتش الجميل
و مش ها ازوّق كُرهى للخيانات
علشان اروح لميعاد قديم مالحقتهوش ..
مع دنيا حبت تنتقم علشان ماحبتهاش
فقررت تطعنى من ضلى
أنا مش ها اموت م البرد ف ليالى الغياب
وانا جوّه روحى ضحكتين دافيين
شوفتهم وقت السفر ..
ف عيون ولادى لما حضنونى وبكيت
ومش ها اخلى الغربة تقتل لهفتى ...
على قلب متحمل جنون حلمى النشاز ..
اختار يشاركنى الغنا
مش ناوى اشك ف حبى للدوشة البريئة ..
ومتعة الفوضى
والخناق جوه البيوت ..
ودموع عتاب اتنين خوات ..
اتصالحوا صدفة ف الطريق
ونظرة ف عيون مكسوفين ..
من تريقة رزلة لسواق ميكروباص
أنا مش ها اطاوع فتنة الشعارات وتأثيرها العنيف
و مش ها اكون صيدة جديدة لتجربة تخريف
بتروّج الإشاعات ...
عن القهاوى والشوارع والوشوش
وبتتهمهم بالجحود
وبتعايرنى بإنهم ناسيين ملامحى وعشرتى ...
وبيكرهونى بعنف
مش ناوى اتقل ف العيار من صنف ..
بهتت احساسيه البليدة تحت تأثير الحياد
أنا لسه متمسك بشدة بانحيازى للحنين
ولرغبتى ف دخول ميدان مزحوم بناس ماكرهتهاش
محتاج اوى أنصب لروحى محكمة
واحس لذة الاعتراف بجرايم العمر اللى فات
و اسمح لآخر قطر ماغادرش الرصيف
يستلف منى العناد ...
ويكمل المشوار
وياخدنى لمصيرى اللى انا مش عارفه إيه
ه يكون أكيد ارحم كتير ..
من شبه إحساس بالحياه
وان حتى كان مؤلم أوى ..
أنا برضه مش ها اندم عليه .