بالصور.. «ثورة الإنترنت»: «يا اللى ساكت ساكت ليه نتك فاصل ولا إيه».. نشطاء: مش عارفين نحمل ولا نتصفح يا منى.. حركة «6 جيجا» تعلن الاعتصام في «ميدان جوجل».. و«أنصار الميجا بايتس» تهدد ب«فلاشات مفخخة»

دشن عدد من مستخدمي موقع التواصل الاجتماعي «فيس بوك»، حملة بعنوان «ثورة الإنترنت»، ضد ما أسموه جشع واستغلال الشركات للعملاء.
وقال القائمون على الحملة في أول بيان تحت عنوان «علشان المصري ميضحكش عليه»، عبر الصفحة الرسمية لحملة «ثورة الإنترنت»: إن «شركات الإنترنت تستخف بعقول المستخدمين، وبيضحكوا عليه بأسعار وسرعات انتهت من زمان».
وأضاف البيان: «الإنترنت في مصر بطيء وخدمة العملاء سيئة، والبنية التحتية في سنترالات الجمهورية سيئة، والشركات بتعمل عروض وهمية يبقى إحنا بيضحك علينا وش».
ودشن النشطاء هاشتاج بعنوان: «#ثورة_الإنترنت»، للسخرية من بطء سرعة الإنترنت ومن التعليقات:
- تعلن حركة 6 جيجا الاعتصام في ميدان جوجل حتى تنفيذ المطالب.
- النت شمال والراوتر فيه مش شغال.
- تعلن جماعة أنصار الميجا بايتس أنه سيكون هناك فلاشات مفخخة وسلوك نت عريانة إذا لم تتحقق أهداف الثورة وخطوات تصعيدية لن يتوقعها أحد.
- الكتاتنى هولز: رئيس الشركة القابضة للإنترنت أبلغنى أنه لا مشكلة بالسرعة ونوجه الشكر لهذه الشركات.. تصفيق حاد من الخرفان.
- مارك زوكربيرغ يعرب عن قلقه إزاء الأوضاع المتوترة في الفيس المصري ويدعو الشركات لتلبية مطالب الثوار.
- مش عارفين نحمل ولا نتصفح يا مني.
- قوات أمن الإنترنت تطلق قنابل الفيروسات لغلق الصفحات والمحتجين يرددون اقفل صفحة اقفل مية مش هتنسونا القضية.
كما نشروا هتافات منها:
- يوم ما أفرط في ميجا هكون ميت أكيد.
- يا اللى ساكت ساكت ليه نتك فاصل ولا إيه.
- مش هنسلم مش هنطاطي إحنا كرهنا النت الواطي.
- ولا بنخاف ولا بنطاطي إحنا كرهنا النت الواطي.
- مش عايزين يحكمنا رواتر
ولا شركات بالميجا بتتاجر
مش عايزين يحكمنا عتاولة
يسقط يسقط نت الدولة
- إحنا الشعب الخط الأحمر.. يسقط يسقط بطء الراوتر.
- علّي في سعر النت وعلّي.. بكرة الثورة تقوم ما تخلي.
- علّي الميجا وعلّي كمان.. الثورة لسة في الميدان.
- ما تعبناش ما تعبناش نت سريع يا إما بلاش.
- هانرددها وناكل النجيلة شركات النت خاينة وعميلة.
- ثورة ثورة حتى النصر.. ثورة في كل لابات مصر.