الرئيس "منصور".. و"زكى قدرة"!

فرضت حالة "الطوارئ" في المنزل.. وطبقت "حظر التجول" في الصالة، وأمرت أفراد العائلة المصونة بالصيام عن الكلام أثناء الحوار المنتظر على شاشة التليفزيون المصرى للرئيس المؤقت المستشار عدلى منصور.. وما أن انتصف الحوار إلا واخترق "المفعوص" أبو نص لسان قرار "الحظر" قائلا:
- هييييييييه.. فين أيامك يا "أبو الأمراث"؟!
- تقصد مين ب"أبو الأمراس"؟
- أوام نثيت الرئيث المعزول محمد مرثى..
- إشمعنى..
- كان ليه هلة وطلة.. وكانت حواراته لكل الناث ولكل الأعمار ولكل الكائنات.. حريمى ورجالى وشبابى وبناتى وأطفالى.. للدكاترة والراجل العادى.. لثواقين الطيارات وثواقين التوك توك.. ومكنش بيحرم حد من حاجة.. "قفشة" من هنا على "فشرة" من هناك.. وآهو الحوار بيطلع في الآخر "درايفنج" مش "دونت ميكس"..!
- إنت هتجيب محمد مرسي لعدلى منصور.. هو صحيح رئيس مؤقت بس عاقل وبيقول كلام موزون بالمسطرة.. مش بيهلفط زى صاحبك إللى محبوس دلوقتى..
- والله الراجل ده ثعبان عليا..
- ميصعبش عليك غالى..
- لأ ثحيح.. أنا حاثث إن الراجل ده مظلوم.. وخدوه من البيت للنار.. تعالى ياحج.. عاوزينك تبقى رئيث.. حاضر.. عاوزينك تقول خطاب.. حاضر.. عاوزينك تعمل حوار.. حاضر.. قول كذا وكذا يا كبير.. حاضر.. والراجل بثراحة مش مخلى وراه حاجة.. وملتزم عالآخر.. من البيت للرئاثة ومن الرئاثة للبيت..
- طيب.. وهو الالتزام بيزعلك؟!.. ومش أحسن من واحد كان بيقعد يرغى ساعتين تلاتة وفى الآخر خلانا مسخرة قدام إللى يسوا وإللى مايسواش..؟!
- مش بيزعلنى ولا حاجة.. بس أنا حاثث إن الراجل ده زى "البغبغان".. بيردد الكلام إللى بيتقاله وخلاث.. افرض "الطوارئ" يفرض الطوارئ.. أعلن "حظر التجول" يعلن حظر التجول.. فكرنى بعادل أدهم لما كان بيقول في الفيلم "إدبح يا زكى قدرة.. يدبح زكى قدرة.. إثلخ يا زكى قدرة.. يثلخ زكى قدرة"..!
- آهو انتو كده يا عيال اليومين دول لا عاجبكم رئيس "مخلوع".. ولا "معزول" ولا "مؤقت".. أومال إيه إللى إنتو عاوزينه..؟!
- عاوزين رئيث بجد.. مش رئيث "ثدى ثوت"..!
- ههههههههه.. حلوة رئيس "صدى صوت" دى!