أم أيمن في لجنة تعديل الدستور.. "التوافقى" لامؤاخذة!

استيقظت في الصباح الباكر عند الساعة الرابعة عصرًا.. وفتحت التليفزيون لمعرفة ما انتهت إليه "لجنة الخمسين" لتعديل دستور 2012 الذي تم سلقه بليل- على رأي إخوانا المثقفين وبتوع السياسة-.. وإذ فجأةً نط أمامى المفعوص أبونص لسان قائلا:
- تفتكر هيعملوا دثتور توافقى ولا مش توافقى؟!
-أكيد هيكون دستور توافقى.
-بأمارة إيه إن شاء الله..؟!
-بأمارة الأسماء الكبيرة المشكلة لتعديل المواد إللى محتاجة تعديل.. وأكيد الأساتذة الكبار إللى في اللجنة دى بيمثلوا كل التيارات وأطياف المجتمع..!
-لأ طبعا.. مش بتمثل كل الأطياف..
-ليه بقى.. فيه ممثلين عن المسيحيين والمرأة والعمال وعلماء الأزهر وأساتذة الجامعات.. دا حتى فيهم ناس من حزب النور السلفى..
-كل دا ثحيح.. لكن فيه طوايف تانية ملهومش حد يمثلهم..
-زي مين بالظبط..
-عندك طايفة المتاجرين بالدين.. وطايفة البلطجية.. وطايفة المجرمين.. وطايفة الإرهابيين.. وطايفة الكدابين.. وطايفة الفاثدين..
-حيلك حيلك.. ما هو أكيد اللجنة هتراعيهم وهما بيعدلوا الدستور.. وأكيد أكيد الناس دى مقامها محفوظ.. دا حتى البلد متمشيش من غيرهم..!
-طيب وبالنثبة لأيمن نور وعصام ثلطان ومحمد الثاوى وأم أيمن.. مين إللى هيمثل الناث دي؟! ومين اللي هيمثل العبقرى توفيق عكاشة واللوذعى مثطفى بكري؟!
-يا حبيبى إنت شكلك فاهم "التوافق" غلط..
-لا والله ياحج – لامؤاخذة- إنت إللى باين عليك مش فاهم البلد دي ماشية إزاى.. وأنا بقول كده عشان نعمل "دثتور" توافقي ميخرش المية.. ومنرجعشى نضرب بمب كل شوية..!
-خلاص ابقى روح قول الكلام ده لأحمد المسلمانى!
-شكل الكلام مش جاى على مزاجك.. أنا غلطان إللى بحاول أنورك.. وانت أصلا مش عارف اللجنه دى تم اختيارها ازاى.. انت مش حاثث بحاجة يابا!
_ طب قول انت يافالح تم اختيارها ازاى !
_كده أهوه يابابا.. "حادى بادى كرمب زبادى.. شالو وحطو كله على دى"
_ يلا ياد من قدامى.. يلااااااااااااااااااااااااا !!