خازوق النائب الملّاكي..!!

لم أصدق ما سمعته عن تقديم النائب العام الجديد استقالته للمجلس الأعلى للقضاء.. فسارعت الخطى للوصول إلى المنزل للتأكد من الخبر.. وبمجرد أن فتحت باب الشقة، توجهت مباشرة إلى التليفزيون، ولكنى اصطدمت ب"أبونص لسان" الذي قال لى:
- مالك متثربع على إيه؟!
- عاوز أتأكد من خبر سمعته وأنا جاى فى المواصلات؟
- خبر إيه إن شاء الله؟
- استقالة المستشار طلعت عبدالله إبراهيم النائب العام الجديد.
- يا راجل.. وده بقى اللى مخليك مش على بعضك وجاى جرى وكأنك معزوم على لحمة ضانى..
- إيه.. هو الخبر ما يستهلش؟
- طبعا يثتاهل.. بث الأهم إن اللى خلاه يقدم اثتقالته هما تلاميذ المثتشار أحمد الزند، رئيث نادى القضاة.. وهما اللى طلعوا النائب الملاكى بتاع "مرثى" وجماعته من مكتبه مهزومًا منكثرا وحاطط راثه فى الأرض.. وهما دول بقى أمل القضاء المصرى.. مش تقوللى الأخوين "مكى" أو الأخ "الغريانى"، أو المعلم زكريا عبعزيز.. إللى لبثونا فى الحيط وجابولنا وجابوا العار للقضاء..
- بس الريس مرسى كان بيقول إن النائب العام ده هو اللى هيجيب حق الشهدا.. وهو اللى هيفتح ملفات الفساد.. وهو اللى هيطهر القضاء.. وهو اللى هيحاسب رموز النظام القديم محاسبة الملكين..
- قثدك هو ده النائب الخاث اللى عينه مرثى عشان ينفذ خطة الإخوان فى التمكين للثلطة.. ويقمع خثوم الجماعة والمعارضين ليهم.. بدليل اللى حثل مع المثتشار "مثطفى خاطر" اللى كان بيحقق مع المتهمين بتوع الاتحادية..
- شكلك بتتلكك عشان نفسك المستشار عبدالمجيد محمود النائب العام القديم يرجع..؟!
- يرجع ولّا ميرجعشى مش دى القضية..
- أومال إيه القضية يا فالح؟!
- المشكلة إن رحيل النائب العام الجديد هيكون يوم الحد الجاى.. زى ما قال المثتشار أحمد مكى، وزير العدل.
- مفرقتشى كتير.. دا كلها يومين.. وهيعدوا هوا..
- ما هو يا حج خلال اليومين دول هيكون الاثتفتاء تم على خير.. والتزوير هيتم تحت إشراف ثيادة النائب.. ويوم الحد هيكون عند الريث وجماعته دثتور يحقق رغباتهم وفقا للدثتور والقانون.. وبما لا يخالف شرع الله.. يعنى ثاعتها هيكون انتهى دور نائبهم الملّاكى.. ومش هيثألوا فيه.. وفى النهاية الشعب هيبلع الطعم ويلبث الخازوق..!!