إلغاء الاستفتاء!!

كنت أتابع بتركيز شديد المؤتمر الذى عقده قضاة مجلس الدولة، والذين أعلنوا فيه رفضهم إكمال الإشراف على الاستفتاء على الدستور فى المرحلة الثانية، بسبب كذب الرئيس محمد مرسى عليهم، وتنصله من كل الوعود التي على نفسه معهم.. وفجأة قال لى أبو نص لسان:
- على فكرة يا بابا الريث "مرثى" عنيد ومبيتهددش من اللى بيعمله القضاة دول.. ودماغه متربثة.. يعنى لو قفلت وتربثت معاه ممكن يلغى المرحلة التانية من الاثتفتاء.. وآهو هيلاقى اللى هيطلع يأيده.. وشوية تكبير على حبة تهليل.. العملية هتعدى.
- إنت بتستهبل طبعا ميقدرش يلغى حاجة زى دى.. ولو عمل كده الناس كلها هتقوم عليه.. وممكن تكون فيها نهايته.
- لا نهايته ولا يحزنون.. هيا ديتها تليفون يجيله من الراجل الكبير اللى فى "المقطم" ويقوله إلغى الاثتفتاء.. ولا تجادل ولا تناقش يا أخ "مرثى".. وساعتها عمنا "مرثى" هيقول ثمعا وطاعة.. وعُلِمْ وجارى التنفيذ.. بث وحيات أبوك يا كبير تبعتلى الناث بتوعنا عند الاتحادية ورابعة العدوية عشان يحمونى.. ويمنعوا عنى غضب الثوار..
- وافرض إن كلامك ده فيه شيء من الصح.. تفتكر "مرسى" وجماعته هيبرروا للشعب قرار إلغاء المرحلة التانية بإيه.. وهيقولوا للناس إيه بعدما نتيجة المرحلة الأولى تمت!
- بثيطة خالث.. هيقولوا للناث إننا اكتفينا بالمرحلة الأولى كعينة كبيرة تضم كل فئات وأطياف المجتمع المصرى.. وهنوفر على المثريين التعب والبهدلة والوقفة فى الطوابير بالثاعات.. وكمان هنوفر الفلوث اللى هتنثرف على المرحلة التانية والبلد محتاجة كل مليم دلوقتى.. وقبل ما يطلع القرار ده ب24 ثاعة هتلاقى "الإخوان" وأنثارهم نازلين عند ميدان "النهضة" ورابعة العدوية والاتحادية عشان يأيدوا تطبيق الشريعة الإثلامية..
- شريعة..!! وإيه إللى جاب الشريعة فى الاستفتاء؟
- ما هو لازم أى قرار يطلع من مكتب الإرشاد يكون فيه كلمة "الشريعة" عشان يضمنوا تأييد "الإثلاميين" ليهم.. وعشان كده تلاقى كل مليوناتهم "الشرعية والشريعة".. "الإعلان الدثتورى والشريعة".. "إقالة النائب العام والشريعة".. "إلغاء المرحلة التانية من الاثتفتاء والشريعة" وكده يعنى..!
- وتفتكر المجتمع الدولى هيوافق على كده..؟!
- هههههههههه.. دولى؟!.. منجيلكشى فى دولى يا عم الحج.. وحياتك ديتها يقولوا لهم "ثينا" ل"غزة" مقابل إلغاء "الاثتفتا".. ثاعتها محدش هيفتح بقه..!!
- صحيح "أغبيا" ويعملوها..!!