الشيخ "يوسف القطراوى"!

كنت أطالع الأخبار فى الصحف ووسائل الإعلام المختلفة.. بينما كان "المفعوص" يحشر رأسه فيما أقرأ.. كنوع من "الغلاسة" الأسرية التى لا تنتهى.. وعندما استوقفنى خبر للشيخ "القرضاوى" يقول إن التصويت ب"لا" على الدستور سيُفقد مصر 20 مليار دولار من "قطر".. بادرنى أبو نص لسان قائلا:
- مش هو ده الشيخ الدكتور يوثف القرضاوي، رئيث الاتحاد العالمي لعلماء المثلمين..؟
- أيوه يا لِمِض..
- وفضيلته قاعد فى "قطر" ولّا فى "مثر"؟!
- وتفرق معاك فى إيه؟
- تفرق كتير يا حج.. اللى بره مش زى إللى جوّه.. واللى بيشيل الطين من ورا كل اللى بيحثل هما الناث الغلابة، اللى ميعرفوش غير تراب البلد دى.. اتولدوا فيها.. وعاشوا على أرضها.. ووقفوا فى طوابيرها.. وشربوا من مية مجاريها.. وأكلوا من عيشها أبو شلن اللى مليان من خيرات ربنا.. خشب وثراثير ومثامير.. وفى الآخر ماتوا وملقوش تمن حباية إثبرين..
- بس فيه ناس قاعدة بره وبتحب مصر وبتخاف عليها برضوا زى اللى قاعدين فيها ويمكن أكتر..!
- طبعا يا حج.. بث أعتقد أن الشيخ "القطراوى" مش منهم..!!
- تقصد الشيخ "القرضاوى"؟!
- مش فارقة كتير.. آهو "قرضاوى" النشأة "قطراوى" الهوية.. وأهم حاجة إنه كل حين ومين يقول كلمتين يثخن بيهم الشعب وهو قاعد معزز مكرم فى الدوحة.. ولا عمرنا شفناه أو ثمعناه بيجيب ثيرة قطر أو الأمير بتاعها بكلمة وحشة.. ولا حتى قال رأيه فى اللى بيحثل للمثلمين فى فلثطين.. وبورما.. وكأنه عميل لإثرائيل..
- حاسب اوعى تغلط أكتر من كده.. ومتنساش إن لحوم العلماء مسمومة..!!
- مثمومة ولّا مشمومة.. كبر دماغك.. العالم اكللى بيخدم الثلطان أو الحاكم ميثتحقش الاحترام.. العالم اللى ينعى شهداء الإخوان، وميفتكرش شهداء الثورة بكلمة شكر لا يثتحق الاحترام.. العالم اللى بيقول فتاوى تفثيل ويبيع الشعب على أول محطة لا يثتحق الاحترام.. العالم اللى بيأيد دثتور عارف إنه ملطخ بدماء الشهداء ولا يطبق الشريعة كما كان يروج دائما لا يثتحق الاحترام.. العالم اللى يفكر إن "قطر" هى التى ترزقنا لا يثتحق الاحترام..
- صلى على النبى واهدى شوية.. انت دخلت فى الراجل شمال كده ليه..!
- ما هو من كلامه اللى يفور الدم ويثمم البدن.. مش بكفاية راضيين بالهم والهم مش راضى بينا..!!