يا فرحة "أبوعلاء" فينا!

فرضت حظر التجول فى "الصالة".. وحذرت "المفاعيص" من الاقتراب من المنطقة المحيطة ب"التليفزيون".. ومنعتهم من الحركة أو الكلام أو الهمس؛ وجلسنا جميعا نترقب الخطاب الذى طال انتظاره.. لحامينا وقائدنا وملهمنا وولى نعمتنا.. فخامة الرئيس المبجل المعظم محمد مرسى، رضى الله عنه وأرضاه.. وبعد أقل من خمس دقائق من الخطاب.. اخترق "أبو نص لسان" حظر "الصمت" وبلهجة حادة قال:
- ممكن حضرتك تجيب قناة "ثبيث تون" أو "كرتونيتو" أو "طيور الجنة" بدل الغم إللى إحنا بنسمعه ده..
- غم!!.. إنت بتسمى خطاب الرئيس غم.. الخطاب اللى هيكشف فيه الحقايق والمستور.. ويعرى فيه المستخبى.. ويظهر الطرف التالت على حقيقته.. ويقولنا مين اللى قتل الثوار فى محمد محمود.. ويجيب حق اللى ماتوا عند قصر الاتحادية..
- هههههه.. حق الشهدا.. اتحادية.. منجيلكشى فى حقوق يا حج.. هو إنت مش بتحرم أبدا.. والدكتور قايلك تبعد عن الحاجات اللى بترفعلك الضغط، وتعلليلك السكر.. وفى الآخر مثمم على إنك تضر نفثك وتثمع خطبة الرئيث.. وصدقنى مش هيقول جديد.. والجواب بيبان من عنوانه..
- اخرس وحط لسانك جوه بقك.. دا من إمبارح وهما بيقولوا إن الرئيس هيقول خطاب للشعب هيكشف فيه حقايق مهمة.. وف منتهى الخطورة..
- ربنا يثبرنا.. ويعدى الخطاب ده على خير.. وميشمتش "أبوعلاء" فينا، لا هو ولا حبايبه فى طرة..
- اسكت بقى خلينا نسمع..
- نثمع إيه.. وإيه الكلام إللى بيقوله ده.. بلطجية إيه.. ومؤامرات إيه.. وتمويل أجنبى إيه.. وأجندات خارجية إيه.. وطرف تالت إيه.. هما مش قبضوا على المعلم "ثبرى نخنوخ" اللى كان بيورد البلطجية زى ما قال "البلتاجى"..
- يا تحترم نفسك وتخلينا نسمع، يا تقوم من هنا..
- أنا برضو اللى أحترم نفثى ولّا هو اللى يحترم نفثه.. دا مفيش كلمة قالها تخش العقل.. أقطع دراعى إنه حافظ الكلمتين اللى كان بيقولهم "مبارك" وولده "جمال" والحزب الوطنى بتاعهم.. ومش فاهم هو بيقول إيه.. و"الغباء" طافح فى كل كلمة بيقولها.. وزمان "المخلوع" مزأطط ع الآخر.. وقاعد وثط شلته فى طرة مثخثخ على روحه من الضحك..
- والمخلوع هيضحك ليه إن شاء الله..
- من الغباء بتاعنا.. وزمانه بيقول للى حواليه.. ربنا غضبان ع الشعب ده.. ابتلاهم بواحد أسوأ منى.. كل ما يعوز يعاقبهم يثمعهم خطبة من بتوعه.. وكله بالحوار وبالحب بالحضن..!!
- بقولك إيه.. متقرفناش.. وخلينا نتفرج على توم وجيرى على رواقة..!!