ولاد البطة الثودة

علي غير العادة، اتصل بي المفعوص أبو نص لسان علي هاتفي المحمول، أثناء وجودي في العمل.. قائلا: شوفت الإخوان "الإليكترونيين" عاملين إيه على ثفحات التواثل الاجتماعي؟
- تقصد مين بالإخوان "الإليكترونيين"؟
- اللجان الإليكترونية لجماعة الإخوان المثلمين.
- خير إن شاء الله.. يا ريت تقول بسرعة وتختصر.
- باثم الله ما شاء الله.. كل ثفحات الجماعة ودراعها الثياثي "الحرية والعدالة".. وموقع إخوان أون لاين.. وشبكة نبض الإخوان.. ونن عين الإخوان.. وروح قلب الإخوان.. كلهم عاملين حملة تأييد ودعم ل"شريف منثور" مذيع قناة "مثر25" الدراع الإعلامي للإخوان.. وهات يا بوثتات وشيرات، للتضامن مع المذيع اللي تم التحقيق معه أمام النائب العام بتهمة إهانة القضاة، زيه زي وائل الإبراشي وريم ماجد، وجيهان منثور، وهالة ثرحان، ولميث الحديدي..
- ياه.. دا بقى اللي مخليك تتصل بيا وتعطلني عن شغلي؟.. كل ده أنا عارفه.. وكمان فيه عدد من العاملين بالقناة، وشباب الإخوان نظموا وقفة احتجاجية أمام نقابة الصحفيين للتضامن مع "منصور"، وطالبوا بتدخل الرئيس مرسي لحماية الكلمة، وعدم إرهاب الإعلاميين.
- طيب.. حضرتك مش ملاحظ حاجة غريبة؟
- زي إيه بالظبط؟
- إنهم معملوش كده مع الثحفيين بتوع جريدة "الشعب" اللي قفلها "المخلوع" ورجالته.. ولغاية دلوقتي الثحفيين دول رجليهم حِفْيت.. وريقهم نشف وهما بيطالبوا بحقوقهم..
وكمان كانوا فين لما تم منع مقالات الكتاب الكبار في الثحف القومية بتاعت الشعب.. وكانت فين "حرية الكلمة" مع "إثلام عفيفي" رئيث تحرير "الدثتور"، وإغلاق قناة "الفراعين" بتاعت "توفيق عكاشة".. والاعتداء علي "خالد ثلاح".. وتهديد "ثعيد شعيب" بالقتل.. وغيرهم من الثحفيين والإعلاميين اللي اتعرضوا للظلم.. ولّا هما دول ولاد البطة الثودة، والأخ "شريف منثور" ابن البطة البيضة؟!
- لأ يا حبيبي.. جايز تكون اللجان الإليكترونية للإخوان معرفتش كل اللي بتقول عليه ده.
- انت فاكرني أهبل يا بابا.. أنا ثحيح ثغير لكن واعي لكل حاجة بتحثل في البلد دي.
- يا لِمِض.. لازم تفترض "حُسْن النية".
- "حُثْن النية"!!.. آه.. أنت خايف تقول إن "الشبكة الإخوانية" بتيجي عند دول و"تهنج".. ولّا الأوامر ما ثدرتش ليهم من مكتب الإرشاد بالتحرك؟!
- مش سامعك كويس.. الشبكة بتقطّع.. آلو.. آلو.. آلو!