البطلة "نورهان": "نفسى أفوز بجوائز دولية علشان مصر"

"اسمى نورهان وبحب ماما عشان هى صاحبتى وعلمتنى أجرى من وأنا صغيرة"..
بهذه الكلمات بدأت نورهان عاطف، ذات التسع سنوات وأحد الأطفال ذوى الاحتياجات الخاصة، حواراها معنا؛ حيث تقول بابتسامة مشرقة: "ماما علمتنى الجرى فى البيت .. ومفضيالى الطرقة عشان أجرى فيها براحتى من غير ما أوقع حاجة؛ الصبح بأصحى وألبس بسرعة وأفطر عشان أروح جمعية "معا للأبد" وهناك بقى اليوم بيكون مقسم لحصص بنتعلم فيها إزاى نتكلم زى اخواتنا، وكمان فى فسحة بنلعب Basel و Football، وكل أسبوع فى مسابقات رسم وجرى وحاجات كتير".
لفت انتباهى تلك الروح المتفائلة التى تمتلكها المحفِزة الصغيرة نورهان، فهى مصرة على أنها لا تختلف عن أقرانها وأن التعليم سيمكنها من الوصول إلى نفس السرعة فى الحديث.
وتحدثت "نورهان" عن بطولاتها قائلة: "أنا بطلة فى الجرى وماما وبابا وكابتن صلاح هم اللى علمونى من وأنا عندى 6 سنين، صحيح فى الأول كنت بطيئة بس عمرهم ما قالولى إنى وحشة؛ وكمان لما كنت بعيط كانت مامتى تقولى انتى شاطرة ومحدش بيتولد بطل، عشان كدة مبقتش أعيط خالص وأخذت جوائز كتير من الجمعية، وكمان فى مسابقات مع جمعيات تانية، وكمان أنا شاطرة وبساعد ماما فى شغل البيت وبأكل فاكهة وخضار عشان أكون قوية وأجرى بسرعة".
أما عن أحلام البطلة الصغيرة فتقول "نورهان": "نفسى لما أكبر أكون مدرسة فى جمعية "معا للأبد" اللى بحبها زى البيت، وآخذ جوائز كتيرة خالص فى الجرى من مصر اللى بحبها قوى، وأشوف كل المصريين فرحانين وبيحبوا بعض".