كنباوي وكنباوية.. حلقة رقم (128).. حكومة مابتعرفش!!

كنباوية تشاهد فيلما أبيض وأسود من الأفلام القديمة الرائعة، تشاهد دعاء الكروان لأحمد مظهر وفاتن حمامة وزهرة العلا وأمينة رزق وعبد العليم خطاب ورجاء الجداوي وميمي شكيب ومندمجة حتى أنها لم تشعر بكنباوي أثناء دخوله عليها فيقترب منها كنباوي فيلحظ اندماجها مع الفيلم فيبادرها قائلا:
كنباوي: صحيح الفيلم ده حلو أوي وجامد آخر حاجه والواحد لو اتفرج عليه كل أسبوع مابيزهقش منه بس مش لدرجة انك ماتحسيش بيا وأنا داخل عليكي !
كنباوية: يوه يقطعني، سامحني ياكنباوي ماخدتش بالي منك وأنت داخل وبعدين الفيلم كان شاددني أوي وخصوصا أنت دخلت في المشهد االلي بتصارح فيه فاتن حمامة أحمد مظهر المهندس أنها أخت هنادي وأنها دخلت البيت ده علشان تنتقم منه واعترفت له بحبها وهو كمان اعترف لها بحبه وأنه مايقدرش يعيش من غيرها وأن فراقها والموت واحد، روعة يا كنباوي منتهى الروعة في التمثيل والحوار والأداء والصدق.
كنباوي: بس بس حيلك حيلك إيه ده كله انتي كده ماخلتيش حاجه لأفلام دلوقتي.
كنباويه: هي أفلام دلوقتي دي أفلام ؟ ياراجل سيبك من الأونطه بتاعة أفلام المقاولات وتذاكر الشباك بتاعة السبكية دي أفلام زمان هي الأصل وعلى الأصل دور ياكنباوي.
كنباوي: إيه ياكنباويه انتي حتسيبي السياسه وتدرسي سينما وإخراج؟
كنباويه: لا ياكنباوي أنا ما اقدرش أسيب السياسة أنا السياسة في دمي بس كل مافي الأمر أني حاولت افك شويه وانسي الهم الأزلي اللي مش بيفارقني .
كنباوي: هو فيه حاجهة على الصعيد السياسي مضيقاكي؟
كنباوية: قول هو فيه حاجة مش مضيقاكي يبقي كده السؤال أوقع يا كنباوي.
كنباوي: ايه اللي مضايقك كفى الله الشر؟
كنباويه: الحكومه "المستكنيصة" حكومة الببلاوي وهدوء السيسي وطناش الداخلية
كنباوي: إيه ده كل دول مضايقينك ؟ أمال مين اللي مش مضايقك؟
كنباويه: أنت ياكنباوي الوحيد اللي مش مضايقني
كنباوي: كتر خيرك ياست الكل ويسلم لي لسانك اللي بينقط سكر وشهد ايه بقي اللي مضايقك؟
كنباوية: الحكومه أسلوبها مايع تحسسك كده أن فيها طابور خامس موالي لأمريكا وللإخوان
كنباوي: ايه اللي أوحى لك بكده؟
كنباويه: قانون الأحزاب اللي ظهر بعد ثورة 25 يناير اللي كان لازم يتفعل وما اتفعلش لحد دلوقتي القانون ده بيقر بعدم قيام أحزاب على أساس ديني ومعنى تفعيله حل حزب النور وحزب البناء والتنمية وحزب مصر القوية وغيرها من الأحزاب اللي ممكن تصل إلى 20 حزبا وما اتحلوش لأسباب لا يعلمها إلا الله والحكومة اللي بتماين مع حزب النور وباقي الأحزاب على اعتبار أن حزب النور حزب سلفي معتدل غير دموي والحكاية مفيهاش خيار وفاقوس حل يعني حل بلاش تسويف ومماطلة.. تاني حاجة مضيقاني أن وضع جماعة الإخوان لسه قائم ما اتاخدش فيه قرارات فورية وسريعة وحاسمة لحد دلوقتي.
كنباوي: أنتي عايزة إيه ياكنباوية؟
كنباويه: عايزة حل الجماعة حل جذري وفوري واعتبارها جماعة إرهابية دمويه فاشية زي جماعة النازيين في ألمانيا وجماعه الفاشيين في إيطاليا ومصادرة أملاكها وأموالها مفيش كلام غير ده لا تصالح ولا أي كلام ممكن يتقال قطمه أحسن من نحته ويبقي جزرة وقطمها جحش بلاش كلام فاضي ومهاترات فارغة وشعارات وكلمات رنانة فضفاضة من قبيل الديموقراطية وحقوق الإنسان يعني إيه حقوق إنسان مع جماعة إرهابية استحلت دم المصريين يعني إيه ديموقراطية مع تفشي البلطجة والإرهاب لا يصح إلا الصحيح ياكنباوي لازم من ردع وحسم وقوه وسيبك من كلام حكم العسكر والانقلاب العسكري والكلام المطاطي ده اللي لا بيودي ولا بيجيب.
كنباوي: الله يفتح عليكي ياكنباوية، أصبت وأخطأت الحكومة الببلاوية.
كنباوية: الحق حبيب الله ياكنباوي ده أنا نفسي كمان المساجد يطلع لها قانون أنها لا تستغل في الأمور السياسية والدعائية وتصبح للعبادة فقط واللي يعتلي المنابر إلا رجال دين متخصصون وخريجو أزهر مش كل من هب ودب يطلع يفتي من على المنبر ويقوم الدنيا على بعضها.
كنباوي: ده عين العقل يا كنباوية علشان مايبقاش السايب في السايب والعملية سداح مداح .
كنباوية: عرفت بقي أنا إيه اللي خلاني أسيب السياسة شوية واتفرج على فيلم دعاء الكروان؟ لأني اتخنقت من المياعة والدلع وأنصاف الحلول يا أبيض يا اسود ياكنباوي الضبابية مش مطلوبة اليومين دول ولا أي يومين تانين الصراحة راحة يا كنباوي وواضح أن حكومة الببلاوي "مابتعرفش" !