هل أنت متدين بطبعك؟

"الشعب المصرى متدين بطبعه" عبارة نسمعها كثيرًا ونرددها أكثر، ولكن ما المقصود بها؟ وهل أنت متدين بطبعك؟ ضع علامة (صح) أمام العبارة التى تعبر عن موقفك وعلامة (خطأ) أمام العبارة التى لا تعبر عنك واعرف نفسك:
باسمع أغانى وباتفرج على الأفلام والمسلسلات لكن عارف إن الموسيقى والتمثيل حرام طبعًا ( )
ربنا مش هايرضى ع البلد دى إلا لو الستات قعدوا ف البيت ( )
علماء الإسلام زى محمد حسان ومحمد حسين يعقوب بنى آدمين وبيغلطوا عادي بس احنا لازم ما نجيبش سيرة عشان صورتنا قدام المسيحيين ( )
الشيعة كفرة وبيكرهونا وإيران أخطر مليون مرة من إسرائيل ( )
من حق البنت تلبس اللى هى عايزاه طبعًا بس مش من حقها تشتكى لو حد اتحرش بيها ( )
أنا مش مع الناس اللى بتقول الأدب مالوش لازمة بالعكس قراية الروايات حاجة كويسة خالص بس المهم تكون روايات بنتعلم منها حاجة مش تضييع وقت وخلاص ( )
مافيش حاجة اسمها صداقة بين ولد وبنت الحاجات دى هى السبب ف غضب ربنا علينا ( )
باحب الناس والله ومش بافكر ف نفسى وبس. دانا حتى دايمًا بادعى إن ربنا يشفى مرضانا ومرضى المسلمين ويرحم موتانا وموتى المسلمين ( )
أيوه انا محجبة تحجب موضة بس ع الأقل أنا أحسن م اللى مش محجبة خالص ( )
باحترم المسيحيين طبعًا دول شركاءنا ف الوطن، بس إيه الداعى إنى أقرأ الإنجيل مادام مش مضطر أقرأه؟ يعنى لو بادرسه مثلاً ماشى لكن غير كده نشيل نفسنا ذنوب ليه؟
الحديث بتاع "من غشنا فليس منا" ده الرسول كان يقصد بيه الغش ف الميزان والبيع والشرا مش الغش ف الامتحانات. هو كان فيه امتحانات أيام الرسول أصلا؟ ( )
والله "فلان" ده كويس ومحترم وطيب كأنه مسلم. والله خسارة ف جهنم ( )
لا طبعا مش مقصود بالعلم العلوم الشرعية وبس..لازم ندرس الطب والهندسة والفلك عشان نتقدم، لكن الفلسفة مثلا لزومها إيه؟ هل تقدر تقول عليها علم نافع؟ ( )
ماشى يا عم الإخوان والسلفيين بيكدبوا وبيرجعوا ف كلامهم وبيتحالفوا مع الشيطان و كل حاجة بس مش أهون ما المسيحيين والليبراليين والعلمانيين يمسكوا البلد ويضيعوا الدين خالص؟ ( )
يا عم الدنيا كلها ماشية كده هاعمل إيه أنا مضطر ( )
رأيى صواب يحتمل الخطأ.. ورأى غيرى خطأ يحتمل الخطأ برضه ( )
إذا كانت أغلب إجاباتك ب"نعم" فمبروك ألف مبروك: أنت مواطن متدين بطبعك وهذه الأيام أيامك لأن الدولة الإخوانية هى التى تناسب شخصيتك فهنيئًا لك بها وهنيئًا لها بك.
أما إذا كانت أغلب إجاباتك ب"لا" فهذا- للأسف- زمان ليس لك ولا أنت له أيها اللى مش متدين بطبعك، فماذا أنت فاعل؟
أقول لك؟؟؟ الثورة مستمرة.