على اد ما فيه ناس كتيرة اوي موضوع الحظر ده مضايقها.. زي الناس اللي بتشرب شيشة مثلا.. بقوا حاسين إن الدنيا سودة من غير العادة على القهوة وحجر التفاح أو العنب والحجر الجديد اللي بخوخ على مانجة. أو مثلا زي الناس اللي هوايتها التحرش فما بقاش فيه بنات اصلا في الشوارع لا بالليل ولا بالنهار عشان يتحرشوا بيهم.. وبالتالي أعدتهم في البيت وكمان في وجود معظم أفراد الأسرة.. فيما معناه أنه مش هينفع حتي يتسلوا في أي فيلم من " اياهم " فهما متضايقين آخر حاجة أو كمان الناس للي كانت متعودة تنام طول النهار وتصحي طول الليل .. ودول بقي متضايقين لانهم اضطروا غصب عنهم يصحوا بدري عشان يقدروا يجيبوا اكل ياكلوه بالليل.. لأن بعد الحظر.. ما فيش خروج الا أن فيه ناس كتير اوي مبسوطة جدا من موضوع الحظر ده.. زي درية بنت خالتي.. مبسوطة من الحظر عشان جوزها آعد جمبها ليل ونهار ولا بينزل يعد مع اصحابه ولا بيروح على القهوة والحظر على هواها وكمان واحدة صاحبتي كان بقالها يجي شهرين ما نفضتش البيت .. فخدتها فرصة بقي وغسلت المواعين وغسلت الغسيل وكل يوم بتعد تعمل باديكير ومانيكير وساعات ماسكات للوجه والبشرة بعد ميعاد الحظر الرسمي اما بقي الاطفال الصغيرين فبقوا بيناموا بدري وبيصحوا الصبح بدري يتفرجوا بس على الاخبار.. وبما أن الاخبار فيها مشاهد عنف وقتل طول الوقت فأكيد هما هياخدوا فرصتهم كاملة في أنه يعرفوا الإرهاب على حقيقته ومش بعيد زي ما شفنا الولاد بعد مشاهدة مشاهد الثورة مباشرة على الهواء بيلعبوا في المدرسة لعبة " ثورة " نلاقيهم في العقد القادم من الزمن.. بيلعبوا لعبة مدنيين وإرهابيين.. وآهه كله من فوايد الحظر.. بس الحظر ده غير كل حظر.. فين أيام حظر بورسعيد ولعب الكورة في الشارع.. صحيح ساعة " الحظر " ما تتعوضش " !
