كنباوى وكنباوية.. حلقة رقم (114).. مسيلمة الكداب 2013

مازال الغيظ يتملك كنباوية.. بالبلدي كده عماله تهري وتنكت وكنباوي لا هو على حامي ولا على بارد خوفا على طفله الذي ببطنها من عصبيتها الزائدة وكثرة انفعالاتها مما دفعه أن يلعن الإخوان وأبوهم وسنسفيل جدودهم.
كنباوي: وبعدين معاكي أنا تعبت وياكي قلتلك 100 مرة كفاية انفعال الانفعال والزعل مش حيفيدنا بحاجة وولاد الشياطين عمالين يلعبوا متشات كورة في رابعة ولا همه على بالهم حاجة خالص مش فارق معاهم قرفنا ومروقين الأناني ومكبرين دماغهم نايمين شاربين واكلين لاعبين الله يلعنهم ويحرقهم بجاز وسخ وانتي مش قادرة تعرفي انك حامل والضغط العصبي ده خطر على اللي في بطنك حينفعونا بإيه بقى؟.
كنباوية: متغاظة أنهم تراخوا عن فض الاعتصام أو أجلوه زي ما بيقولوا ومتكاده ونار جوايا.
كنباوي: لا وحياه أمك اعقلي لا أروح فيكي في حديد.
كنباوية: إيه يا راجل انت اتجننت ؟ عاوز تموتني ؟ الواد اللي في بطني روشك ؟.
كنباوي: ما هو لما ما تخافيش عليه يبقى هو مش غالي عندك ولا أنا كمان غالي.
كنباوية: انتوا الاتنين أغلى من بعض بس البلتاجي الحلوف ده مجنني.
كنباوي: انتي عارفة البلتاجي ده عامل زي مين؟.
كنباوية: زي مين؟ الشيطان؟ ولا إبليس؟.
كنباوي: شيطان وإبليس ومنافق وكداب وملعون ومرابي وعميل وجاسوس وخاين ومأجور وأشبه توصيف ليه أنه مسيلمة الكداب.
كنباوية: فعلا شبهت صح ده مسيلمة الكداب اللي بيقول إن البرادعي وصباحي والطيب والسيسي والبابا تواضروس كفار وأن السيسي مابيشوفش النور اللي في رابعة رغم قطع النور.. نور إيه.. دا النور اللي همه سارقينه ولا نور الملايكة هو من إمتى الملايكة كانت بترفرف على رابعة العدوية هى الملايكه حترفرف على بلطجية وشحاتين وأطفال شوارع ومرتزقة وناس ما بتراعيش ربنا قال إيه بينكروا موضوع جهاد النكاح وفيه 76حالة مظبوطة ومتسجلة عندهم وحتترفع عليهم قضايا قريب أوي.
كنباوي: فعلا الحكاية دي حقيقية وفيه محاضر اتسجلت في قسم مدينة نصر من بنات وستات تم اغتصابهن عنوة تحت اسم جهاد النكاح بيرفهوا عن نفسهم واحنا قايدين نار.
كنباوية: بكره يبقى عندنا في مصر أطفال شوارع وأطفال رابعة العدوية من مخلفات جهاد النكاح.
كنباوي: ده غير الجوازات اللي حصلت هناك في شهر رمضان 40 واحدة اتجوزت في رابعة.
كنباوية: خلاص كل العوانس يروحوا رابعة يتجوزوا من هناك.
كنباوي: جوازات الندامة دول مجانين ولاد مجانين مين دي اللي تقبل إنها تتجوز إخواني ؟ دي تبقى مجنونة رسمي أو جاهلة أو مغيبة.
كنباوية: الطيور على أشكالها تقع يا كنباوي وكل شل يشبه شله.
كنباوي: على قولك بس انتي روقي وسيبك من البلتاجي ده لعنة الله عليه بكره يقع والجيش والداخلية مش حيرحموه وحيطلعوا القديم والجديد منه ده واطي وبيردح زي النسوان ولا المهرج اللي اسمه حجازي ده لو الشيوخ كلها بالشكل ده يبقى ألف رحمة على الشيوخ.
كنباوية: شيخ إيه انت بتصدق في الدقن والسبحة والكلمتين اللي بيتقالوا عن الشرع والشريعة والشرعية ده كله كلام ابن عم حديت وفنجرة بوق مالهاش أي لازمة دول تجار دين يا كنباوي تجار دين وجهنم وبئس المصير.
كنباوي: الكداب اللي بيقول إن الملايكة بترفرف على رابعة وأنهم بيعيدوا اللي حصل في غزوة الخندق وأن جبريل نزل لهم في رابعة.
كنباوية: جبريل ! بكره حينزل لهم فعلا ملاك بس مش جبريل اللي حينزل لهم عذرائيل.
كنباوي: يا ريت بس الداخلية تتنحرر شوية وعليا وعلى أعدائي واللي يكون يكون.
كنباوية: ربنا فرجه قريب.
كنباوي: طيب لما انتي عارفة كده قرفاني معاكي ليه ما تهدي وتوحدي الله وخلي العيل ينزل بالسلامة من غير عصبية ولا نرفزه.
كنباوية: خلاص يا كنباوي اطمن على ابنك وعد مني حبقى باردة أوي وكلي برود واللي يحصل يحصل واللي شايفه ربنا يكون.
كنباوي: أيوه كده أحبك وانتي عاقلة وهادية وراسية ورامية حمولك على الله.
كنباوية: ونعم بالله يلا نقوم ناكل لنا لقمة.
كنباوي: كويس انك افتكرتي أني لسه ما أكلتش لحد دلوقتي.
كنباوية: هو أنا أقدر أنسى حاجة زي كده ده أنا لاعشت ولا كنت.
كنباوي: بعد الشر عنك ده انتي الغالية أوي.
كنباوية: وانت كمان الغالي أبو الغاليين.
كنباوي: ربنا ما يحرمنا من بعض ويرزقنا على قد نيتنا.
كنباوية: آمين يا رب العالمين آمين!.