كنباوي وكنباوية.. حلقة رقم (77).. 8 محافظين إخوان ومصر راحت في خبر كان

كنباوية: إيه قولك بقى يا كنباوي بعد ما شوفت حركة المحافظين الجداد؟
كنباوي: القول قولك إنتي يا عاقلة يا مثقفة يا متنورة بعدك مفيش قول ولا كلام
كنباوية: أيوه أيوه افضل انفخ فيا كده لحد ما أفرقع زي البالونة
كنباوي: ما أنا عارف إنك بتحبي النفخ فبديكي اللي بتحبيه
كنباوية: نفخ عن نفخ يفرق يا كنباوي وبطل استعباط انفخ بالراحة علشان مافرقعش منك
كنباوي: ما عاش ولا كان اللي يفرقعك هو أنا أقدر أستغنى عنك يا نوارة عمري بس نوريني إيه حكاية حركة المحافظين دي؟
كنباوية: دي مش حركة محافظين للمحافظات دي حركة محافظين على حكم مرسي والجماعة
كنباوي: إزاي يا كنباوية؟
كنباوية: الراجل قبل يوم 30 حب يأمن نفسه بالمحليات راح عمل حركة المحافظين وجاب 8 محافظين إخوان من الجماعة وعنده من الأول 3 إخوان يبقى المجموع 11 محافظا إخوانيا دي وقاحة وبجاحة عيني عينك
كنباوي: دي شورة مكتب الإرشاد طبعا اللي قاعد يخطط ويدبر هو مرسي فاهم حاجة ده عامل زي مرسي الزناتي في مسرحية مدرسة المشاغبين بالظبط
كنباوية: ده هو كده خلى الشعب يغلي منه أكتر من الأول ده عياره فلت
كنباوي: مش المثل بيقول طول ما انت رايح كتر من الفضايح أهه مرسي حاسس إنه رايح علشان كده بيكتر من الفضايح
كنباوية: ده الإخوان بيدرسوا خطة إنهم يخلوا يوم 30 إجازة في قطاع الحكومة علشان الدنيا تهدى شويه لأ والحكومة كمان حتصرف المرتبات ابتداء من يوم 19 في الشهر تحسبا لحدوث ثورة جديدة
كنباوي: وإيه كمان؟
كنباوية: الإخوان ومكتب الإرشاد بعتوا وفد من عنده يقابل شيوخ السلفية وحزب النور في الإسكندرية علشان يخليهم يرجعوا عن قرارهم بعدم المشاركة في مظاهرات يوم 30 ويطالبوهم إنهم ينزلوا يساندوا مرسي ويقفوا معاه ضد حركة تمرد
كنباوي: والسلفية وافقوا مرسي؟
كنباوية: لأ طبعا همه هبل ولا حينضحك عليهم تاني خلاص انضحك عليهم قبل كده ومرة وعدت وماعدتش تتكرر تاني واللي اتلسع من الإخوان ينفخ في البتنجان
كنباوي: عندك حق بس إنتي شقلبتي المثل خالص يا كنباوية
كنباوية: هي جات على المثل ده؟! اللي أنا شقلبته ما الإخوان ومرسي شقلبوا حالنا وحال البلد ربنا يرحمنا منهم
كنباوي: يا رب يسمع منك ويغوروا في داهية يوم 30
كنباوية: آمين يا رب آمين
كنباوي: ده أنا سمعت إنهم بيغيروا مكان مقراتهم في المحافظات خاصة المحافظات اللي قرفانة منهم علشان ما حدش يتعرض لها يوم 30
كنباوية: دول ولاد حويطة مجهزين كل حاجة دول معتمدين كمان على الحرس الجمهوري في حال تخاذل الداخلية لأن الداخلية قطاع عريض فيها قرفان منهم من ساعة ما مات محمد أبو شقرة في سينا وهو لسه في عز شبابه الظباط محملين مرسي والإخوان السبب في قتل الظابط ده
كنباوي: والحرس الجمهوري حيعمل إيه لوحده؟
كنباوية: مش لوحده معاه الحرس الثوري اللي الإخوان عدوه ليوم زي ده، ده غير كمان الشباب اللي الإخوان دربوهم على القتال والعنف لفض المظاهرات
كنباوي: أنا سمعت إنهم حيستعينوا بحماس
كنباوية: الجيش فهم الفولة وحذرهم والمخابرات كمان حذرتهم وحذرت حماس إن ممنوع أي واحد منهم يتواجد في مصر يوم 30 واللي حيقع في إيديهم في اليوم ده حيكون مصيره القتل وقد أعذر من أنذر
كنباوي: وصلت بمرسي إنه يعادي المصريين بالأغراب ويكري عليهم الحمساوية الله يجازيه
كنباوية: ده طلع من الأشرار يا كنباوي.. من الأشرار
كنباوي: بكره الكتاب الأسود اللي حتطلعه الحركات الثورية حيفضحهم ويفضح ألاعيبهم ونواياهم السيئة وشرورهم وأطماعهم بإذن الله
كنباوية: خلي الناس تعرفهم على حقيقتهم المنافقين الخداعين دول
كنباوي: لابد من يوم معلوم تترد فيه المظالم أبيض على كل مظلوم إسود على كل ظالم
كنباوية: ياه يا كنباوي إنت لسه حافظ الأغنية دي؟! ده أنا بحبها أوي
كنباوي: وأنا كمان بحبها أوي وعلشان كده لسه حافظها
كنباوية: دي أغنية مسلسل ذئاب الجبل
كنباوي: دلوقتي بنقولها لذئاب المقطم ومكتب الإرشاد وذئاب الإخوان
كنباوية: هما ألعن من الذئاب ربنا يرحمنا برحمته منهم أما أقوم أحضر لك الأكل تلاقيك مت من الجوع
كنباوي: ومين سمعك؟
كنباوية: على عيني يا كنباوي دقايق وأكلك يكون جاهز إنت تؤمر يا عنيا
كنباوي: تسلملي عيونك يا كنباوية.. تسلملي