مرارة المصريين

شاهد المصريون إعلانات خلال شهر رمضان كفيلة بفقع مرارة أي حد.. ورغم كدا استحملها المصريون من باب التغيير وأهو الشوف أحسن من مافيش.. عزت أبو عوف بيوجه تحية لكل "المحسوكين" اللي ما بيعجبهمش العجب مع صورة لواحد محتار يختار "جرافتة" من دولابه وآخر ماسك مقص ومش عاجبه فرع زايد في الشجرة وبيقصه وبيختم إعلانه أن دي حياة غير أي حياة.. فعلًا على رأي عادل إمام في الواد سيد الشغال لما قال دا احنا بنموت بعض على ملاليم يا جدع..
وإعلان تاني لواحدة جاية مصر ونفسها تشوف الكاوالتي بتاعة برة هنا وتبعد عن الزحمة وتعيش في الهوا النضيف مع صورة مصاحبة الإعلان وهي بتختار بروش تحطه على الفستان وبتطلع تشوف فيو غير أي فيو.. يا سلام كان ممكن يعدي الإعلان دا عادي ناس معاها فلوس وعايشة.. لكن لما يتلحم فيه إعلان لواحدة ست شايلة ابنها وهي ماشية في شوارع مصر لأنه عنده الروماتيد وعنده هشاشة عظام مع دعوة للتبرع لإنقاذ مريض وإعلان تاني لإنقاذ قلب مريض وكلية مريض والجمعية العلانية والجمعية الفلانية وابن السبيل اللي قاعد في القطر.. فعلا مرارة المصريين استحملت كتير خلال الشهر دا من ملوك الإعلانات يا جدع.. دول صحوا الميتين من تربتهم عشان يعملوا إعلان.. وفؤاد المهندس وبوجي رجعوا تاني وكل سنة وأنتوا طيبين!