عزيزى الإنسان هذه حياتك.. اعمل الصح

أول كلامنا سلامنا يطوف ع السامعين معنى
كلنا بنى أدمين من نسل آدم وأمنا حوا.. اتعلمنا كده وأغلبنا يؤمن بده.. كل واحد فينا بيبقى له أسلوبه فى الحياة محدش بيتشابه مع حد، ولأنى زى أى حد.
قررت أنى أتكلم عن تجربتى على هذا الكوكب الفريد من نوعه، تجربة عادية جدا مفيهاش "صاص بنس" ولا حتى دراما.. حياة بلا تفاصيل مبالغ فيها:
بصحى الظهر.. الشغل.. القهوة.. النت.. النوم.. وهكذا دواليك..بس فى خضم هذا التكرار العظيم بلاقى يومى مختلف جدا.. مفيش يوم تشابه مع اللى قبله، لأنى بعيش كل فقرة من فقرات يومى بشكل مختلف عن اليوم اللى قبله (ديجافو يومى)، بس التشابه المختلف اللى بيعيش فيه ده ميمنعش أن يومى غالبا بيبقى نكد أو بمعنى آخر، يوم مش محسوب من عمرى.
أقولك على حاجة، أنا لو عديت الأيام الحلوة اللى فى حياتى أعتقد أنى هلاقى نفسى لسه متولدش أصلا..أهو الواحد بيتعامل على أنه عايش وبيعد السنين، ومن كل السنين اللى عشتها أنا مش فاكر غير السنتين دول:
سنة 2006 وسنة 2009، السنتين دول شقلبوا حياتى بالكامل.. لكل واحد فينا فترة كده بيتغير فيها دنيته.
بعد السنتين دول اكتشفت أن الدنيا دى أقل من أنى اكتب عنها تدوينة أو نوت.. ومشيت بمبدأ واحد وبس، اُنظر حولك وابتسم
متعملش أكتر من الحاجتين دول.. طب انت تعرف أنك ممكن تحل أى مشكلة فى حياتك بابتسامة.. وطبعا مش هتعرف أن عندك مشكلة أصلا إلا إذا بصيت حواليك وشوفت نفسك قدام نفسك على أنك حد تانى.. هتشوف حياتك كده من غير حيطان، من غير بيبان تتفتح، تقدر تشوف تفاصيلها بطرفة عين.. هتلاقى نفسك بتنتقد نفسك بشكل تلقائى.
لو قدرت تستطعم القرف اليومى اللى بنعيشه وبيعيش فينا.. هتلاقى أنك مبسوط وبلا أدنى داعى.
-- راسبوتين فضل ياخد جرعات قليلة من السم فى أكله لحد ما جسمه بقى منيع ضد السم..طب حد فيكوا يعرف أن الاكتئاب موهبة.. آه والنعمة موهبة.. فيه ناس يقدروا يخرجوا الاستمتاع من كل حاجة حتى الاكتئاب.. ليه تدمر لحظة ممكن تبقى فى يوم من الأيام ذكرى قلبك يبتسم لما يفتكرها.
اعمل كل حاجة بشكل يخليك تفتكرها بعدين.. متحرمش نفسك من أى شعور أو إحساس.. اغضب.. عشان تعرف تسامح.. فضفض .. علشان متفكرش فى اللى مضايقك.. اشتم .. لو مش قادر تستحمل.. قول للى بتحبه "أنا بحبك".. واعرف أنك مش شرط تخسره لو قالك لا.. بس الأكيد أنك ممكن تخسره لو كان ممكن يقولك آه.. اتعب .. عشان تحس بطعم الراحة
ابكي..عشان تعرف طعم الفرحة.. اصرخ .. علشان تسمع نفسك كويس.. افرح .. علشان بكرة احتمال كبير أوى يبقى حزن.
فكر .. علشان عيالك ميطلعوش مغلوب على أمرهم زيك
خليك متدين "أيا كان دينك" وكل يوم اسال نفسك السؤال ده : هو أنا جاهز أقابل ربنا النهاردة؟
ومفيش مشكلة لو ضيفت سكر على حياتك.. متخفش سكر الحياة مش بيجيب السكر.. زغزغ الدنيا علشان تضحكلك واعمل توليفة الحياة.
آه على فكرة قبل ما تكمل.. أنا مريض نفسى.. فكك من أى ألش أنا قلته، أهم حاجة بالنسبة لى أنك تبتسم وأنى أفضفض لحضرتك.
بس كده
فى الآخر أحب أقولك كلمة واحدة بس: عزيزى الإنسان، هذه حياتك.. اِعْمِلْ اِلصَّحْ...............