السيسي يزف بشرى سارة للمصريين بشأن فرص عمل بمبالغ كبيرة بقطاع الاتصالات

مؤتمر حكاية وطن، قال الرئيس عبد الفتاح السيسي: "قطاع الاتصالات عنده فرصة حقيقية للنمو في بلدنا في ظل الظروف اللي بنمر بيها، والتحول الجيو سياسي وده محتاج مننا كمجتمع ووزارة التعليم العالي ووزارة التربية والتعليم نشتغل ونحط إيدينا في ايد بعض مؤسسات الدولة المختلفة وأجهزتها مع رؤية وزارة الاتصالات اللي بتستهدف تحقيق 10 مليارات دولار في 2026".
مراكز الاتصالات
وأضاف خلال مؤتمر "حكاية وطن": "أنا النهاردة بيخش عندي شابات وشباب في كليات بيقعد 4 سنين، لو ال4 سنين الشاب اقتنع إنه ممكن يقضيهم في المنشآت ومراكز التدريب الخاصة بوزارة الاتصالات وفي التعليم المتعلق بالاتصالات هيخرج منها بفرصة عمل، لإن التعليم التقليدي اللي بيتعلمه دلوقتي مش هيتيح له فرصة عمل".

فرص عمل بقطاع الاتصالات
ولفت: "إحنا بندور على شباب وشابات في الجتمع قادر على تلبية مطالب وزير الاتصالات المتعلقة بتكنولوجيا المعلومات والذكاء الاصطناعي، هل السوق العالمي يقدر يلبي يستوعب كل اللي تقدمه، بلا شك لغاية مليون فرصة عمل في السنة، بقى أنا عندي مشكلة في الخريجين بتوعي اللي بيتخرجوا من الجامعة ومش عارف أوفر لهم فرصة عمل وحياة مناسبة لهم في ظل مشاكل كتير من اللي عندنا، وعندنا قطاع الاتصالات اللي ممكن ينمو 30% ومنستغلهوش، لازم نستغل فرصة الاتصالات".

1.5 مليون فرصة عمل بقطاع الاتصالات
وأكمل: "إحنا نفضل شايلين الهم ومتضايقين، ونفكر إزاي نقنع ولادنا وبناتنا علشان يتجهوا الاتجاه الصح، إزاي أنت داخل كلية الآداب وتقديري لها عال، وكذلك الحقوق والتجارة ولكن فرص العمل فيها مش كتير، وأنت عندك قطاع مستنيك لو قضيت ال4 سنين في مجال الاتصالات هتجد فرصة عمل بأرقام كبيرة، عندنا فرصة كبيرة جدا في ظل التحول اللي بيحصل وحجم الطلب المطلوب في المجال واللي العالم مش قادر يلبيه لإن كله قدم كل ما لديه"، ليعقب وزير الاتصالات: "عندنا فجوة مهارية في دولة هي الأشهر في قطاع الاتصالات وهي الهند لديها عجز مليون وظيفة، اللي فيها 1.5 مليار نسمة".

مقترح السيسي للاستفادة من خريجي الكليات بقطاع الاتصالات
وتابع السيسي: "قطاع الاتصالات والصادرات الرقمية مهم جدا، وعلشان أعمل أي مصنع بخش في منافسة كبيرة جدا واستثمارات كبيرة أوي قد لا تكون متوفرة وعندي قطاع مش مستغل، باقول لكل أب وأم وللإعلام والدراما عايزين نسوق الفكرة ونبيع ونقنع الناس بالفكرة بتاعت دراسة الاتصالات وتكنولوجيا المعلومات، بدل ما يقعدوا بأولادهم أمام مركز الدروس الخصوصية، يروحوا مراكز التدريب الخاصة بوزارة الاتصالات، وكل المطلوب يبقى معاه أي باد أو حاسب من أي نوع والشغل مفتوح لكل المتخصصين من كل الخلفيات والكليات، وأنا اتكلمت في الموضوع ده في مؤتمر الأسرة المصرية، وقلت إن إحنا لما جينا نعمل برنامج الماجستير عملنا اختبارات علشان ناخد الناس لإننا بنحطهم في برنامج قوي جدا تكلفته ساعتها 30 ألف دولار، وبعدين الدكتور مصطفى مدبولي قال لي تراجع عن ال30 ألف دولار دلوقتي لإنه كتير عليا وأعطيهم تدريب 9 شهور بدل ما كنا بنتكلم في سنة ونص، ولكن مهم إن الفكرة تبقى موجودة عند الناس في مصر بعددنا الكبير، سواء في التعليم العام أو العالي.. يا جماعة انتو بتودوا ولادكم فين؟! وبعدين بتتخانقوا علشان ياخد شهادة ليسانس أو بكالوريوس، وفرصتها في الشغل مش موجودة وبعدين تشغلوه أي حاجة، طيب ما تروحوا مراكز الاتصالات ونديهم شهادة لو ليسانس أو بكالوريوس.. يا وزير الاتصالات طالما الموضوع شهادة، سواء كانوا خريجي آداب أو تجارة أو كلية اخرى، كسروا الحواجز وأي حاجة تعوق الفكرة اتعاملوا معاها علشان بدل ما نحلم ب10 مليارات دولار يبقى بنحقق أكتر من كده بكتير".
السيسي يكشف تفاصيل مركز البيانات المدفون على عمق 15 مترا بتكلفة مالية ضخمة
وزير الاتصالات: 150 مليار جنيه لإحلال شبكات الإنترنت و110 مليارات لمضاعفة أبراج المحمول
أرقام مالية كبيرة في مجال الصادرات الرقمية
ولفت: "أنا مش عايز أجيب أسماء دول عددها 1/20 مقارنة بينا، وبتجيب أرقام مالية كبيرة في مجال الاتصالات والصادرات الرقمية".
نقدم لكم من خلال موقع (فيتو) ، تغطية ورصد مستمر علي مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.