الرئيس السيسى يطلق رسميا منصة مصر الرقمية: لو تواجد 100 ألف دارس عندهم مقومات هصرف عليهم 12 مليار جنيه.. ثقافة التعليم تحتاج تطوير وتعديل.. ويؤكد: المصريين بيدخلوا جمعيات عشان يصرفوا على الدروس الخصوصية

** الرئيس السيسي: المراكز الرقمية محصنة وتكلفة المبنى الواحد 10 مليارات جنيه
** الرئيس السيسى: تكلفة المراكز الرقمية وميكنة الحى الحكومى تصل ل100 مليار جنيه
** الرئيس السيسى: شركة العاصمة لديها كشف بنوك وائتمان محتمل ب40 مليار جنيه كاش
** الرئيس السيسي: البلاد بتفضل تبنى وتعمر في نفسها علشان تاخد مكانها وسط الأمم وده مبيجيش غير بالصبر والأفكار والتضحيات
** الرئيس السيسي: الجمهورية الجديدة تحتاج إلى أموال وأرقام كبيرة جدا
** الرئيس السيسي: شركة العاصمة ترغب بتأجير الحى الحكومى ب4 مليارات جنيه سنويا
** الرئيس السيسي: المراكز الرقمية العملاقة تتكلف أموال فوق التصور
** الرئيس السيسى يفتتح 3 محطات للإنزال البحرى ومركز البيانات الإقليمى بالقاهرة ومدرسة التكنولوجيا التطبيقية بمدينة نصر ومتحف البريد المصرى بالقاهرة بعد تطويره
** الرئيس السيسي: يوجد برامج تليفزيونية قادرة على إظهار مواهب وقدرات الشباب مثل برنامج الدوم
** الرئيس السيسي: "أنا بتكلم مع أهلى وناسى وأتمنى اعمل لهم أحلى حاجة فى الدنيا"
** الرئيس السيسي: "اللى بيتعمل فى مصر أمر غير مسبوق.. وكل الرضا على دعم ربنا"

شهد الرئيس عبدالفتاح السيسي، صباح اليوم الأربعاء، افتتاح العديد من المشروعات الرقمية، وكان على رأسها، الإطلاق الرسمي ل "منصة مصر الرقمية".

قاطع الرئيس عبد الفتاح السيسي، الدكتور عمرو طلعت وزير الاتصالات وتكنولوجيا المعلومات، خلال كلمته ضمن فعاليات افتتاح عدد من مشروعات "مصر الرقمية"، قائلا: "انت بتتكلم على الكلام اللى اتعمل بيه المراكز.. بس أنت ما اتكلمتش عن أن المنشآت اللى اتعملت فيها اتكلفت كام.. بقول كده للناس اللى موجودة دلوقتي وبتسمعنى.. علمنا الرأسي والتبادلي.. التبادلي متكلف بنية إنشائية 10 مليار جنيه.. والرأسي أكثر شوية".

وأضاف الرئيس السيسي: "الفكرة هنا لما نتكلم على موضوع.. منين وبكام؟.. ليه احنا عملناه.. لكن عملناه بكام وده جه منين.. المراكز دي معمولة محصنة لا يمكن الاقتراب منها خالص وبأي شكل من الأشكال.. 15 متر تحت الأرض.. المركز الواحد متكلف 10 مليارات جنيه على الأقل إنشاءات مدنية لتوفير مكان لوضع فيه الخوادم الرئيسية".
وتحدث الرئيس عبد الفتاح السيسي، عن التكلفة المالية لإنشاء المراكز الرقمية، قائلا: "الدكتور عمرو بيتكلم عن التكلفة المالية بتاعة الشبكات جوه المركز.. مش الشبكة اللى بتتصل ب 20 ألف مبني لربط الدولة أو لربط الحي الحكومي".

وأضاف الرئيس السيسى، خلال كلمته في افتتاح عدد من مشروعات مصر الرقمية: " لا أبالغ لو قولتلكم علشان نخلي الحي الحكومي مميكن بشكل يوفر عمل متقدم جدا للدولة المصرية سواء عملنا مراكز البيانات أو الجزء اللى اتعمل على 50 ألف موظف.. ثم الشبكة المؤمنة.. والمراكز الأخرى.. بنتكلم فى 100 مليار جنيه.. أنا لا أبالغ.. بس انا عارف الرقم ده جنب الرقم ده جنب الرقم".
وقال الرئيس عبد الفتاح السيسي: "احنا عاملين اليوم ده للمصريين والدولة المصرية علشان نلقى الضوء على أهمية الموضوع ده علشان مستقبل بلادنا وأولادنا.. من فضلك يا دكتور عمرو خد راحتك وبراحة علشان الناس تعرف".
وتابع الرئيس السيسي: أن شركة العاصمة الإدارية ترغب في تأجير المقرات داخل الحي الحكومي، قائلآ: "العاصمة فيها حاجات كتير.. كل اللى عملته كشركة وعلشان كده عاوزة تأجر المنشآت.. منشآت الحي الحكومي.. عاوزه تأجر منشآت الحي الحكومي بكام بقي في السنة يا دكتور معيط.. ب 4 مليارات جنيه في السنة.

وأضاف الرئيس السيسي: "كل سنة وأنتم طيبين على العيد.. الناس كتير تتكلم وتقول انتوا بتجيبوا الفلوس دي منين.. الحي الحكومي جايبينه منين.. والعاصمة جايبنها من أموال الحكومة.. بالنسبة للموارد مفيش الا الأفكار.. وعلشان كده شركة العاصمة عملت وبتقول 4 مليارات جنيه في السنة".
وأشار الرئيس عبدالفتاح السيسي، إلى أن شركة العاصمة لديها كشف بنوك وائتمان محتمل بقيمة 40 مليار جنيه كاش ، فضلا عن مستحقات بقيمة 80 مليار جنيه، مضيفا: "الهدف اللي انا بقوله ده علشان كتير من الناس بيسمعوني واتكلمنا في الموضوع من 4 سنين .. حد يقولى انتوا بتعملوا العاصمة ليه ؟ انتوا معاكوا فلوس للحكاية؟ إدونا الفلوس نعيش بيها".

أضاف الرئيس السيسي: " البلاد مبتعش كده .. البلاد بتفضل تبنى وتعمر في نفسها علشان تاخد مكانها وسط الأمم وده مبيجيش غير بالصبر والأفكار والتضحيات".

وتابع الرئيس: "لما جيت على مراكز البيانات ساعة لما طرحنا الموضوعات دي كانت بعيدة علينا قالك هتجيبوا الفلوس دي كله منين؟..اذا كنتم عاوزين تعملوا دولة ذات شان زى ما بتشوفوا في الدول المتقدمة، تشتغل ازاى الحكومة بتاعتها ..تقولها عنوان في برنامج إعلامي أو التليفزيون تقولها عنوان الحكومة الذكية، لكن علشان أعمل الحكومة الذكية تكلفني 100 مليار جنيه".
أضاف الرئيس السيسى: "عملنا ده علشان نقول للناس إذا كنتم بتتكلموا فى التعليم وعاوزين تعرفوا التعليم اللى يبقا ليه فرصة حقيقية لبلادنا وأولادنا فى العمل..اللى احنا بنتكلم عليه اليوم كله معمول علشان كلنا ننتبه ونهتم ونبذل الجهد سواء التعليم أو المبادرات المطروحة أو حتى اللى ممكن يتعمل علشان ندى فرصة حقيقة للموضوع".

وتابع الرئيس: لما عملنا مسابقة طلع 111.. بفكركم بالموضوع وساعتها قابلنى الدكتور خالد وزير التعليم العالى وقالى لو عملنا مسابقة غير كده هنجيب عدد أكبر من كده وأنا بقول ياريت والله يا خالد.. بقولك الكلام ده والله يا خالد وأتمنى والله العظيم لو اتوجد 100 ألف دارس عندهم مقومات لدراسة العلوم التكنولوجية المتطورة هصرف عليهم 12 مليار جنيه فى تعليمهم هاتوا ال100 ألف فاهمنى وفاهمهم".

وأكد الرئيس عبد الفتاح السيسي، أن الدولة المصرية جادة في ملف التحول الرقمي، قائلا: "لما الدولة المصرية تجي تعمل موضوع زي ده.. علشان تحقق التحول الرقمي بعد كان بتشتغل ورقي.. واحنا شغالين دلوقتي بنعمل ذكاء صناعي يكون فيه جزء من العمل يكون فيه ذكاء صناعي.. الرقم كام وكلفنا كام؟ علشان تعرفوا أنه لتحويل الدولة دي إلى دولة نقول علها جمهورية جديدة.. ارقام كبيرة جدا جدا.. الحكومة دفعت كام .. الدكتور عمرو وزير الاتصالات فاكر ال 10 مليار جنيه بتوعه بس".
قاطع الرئيس عبد الفتاح السيسي، الدكتور عمرو طلعت وزير الاتصالات وتكنولوجيا المعلومات، خلال كلمته في افتتاح عدد من مشروعات "مصر الرقمية"، قائلا: "يا دكتور عمرو.. هو لما انت تقولهم مراكز البيانات العملاقة.. مش تقولهم الرقم اللى اتعملت بيه الحاجة.. الحاجات دي علشان تتعمل بتأخد أموال فوق التصور".
وشهدت فعاليات افتتاح عدد من مشروعات مصر الرقمية لوزارة الاتصالات وتكنولوجيا المعلومات بحضور الرئيس عبد الفتاح السيسي، عرض فيلم تسجيلي بعنوان: "مصر الرقمية".

استعرض الفيلم التسجيل، جهود الدولة المصرية فى ملف التحول الرقمي، وتقليل الاعتماد على الورق، من خلال مشروع قومي جديد "مصر الرقمية"، تحت إشراف وزارة الاتصالات وتكنولوجيا المعلومات، وربط أكثر من 33 ألف مبني حكومي، وتعاون وزارة الاتصالات مع باقي الوزارات لميكنة كافة الخدمات الحكومية، من أجل حكومة متكاملة رقمية لتقديم كل الخدمات من مكان واحد "منصة مصر الرقمية"، من خلال أن كل الخدمات موجودة على شبكة الإنترنت بشكل بسيط وفى مكان واحد، وتكون متاحة 24 ساعة فى اليوم طوال أيام الأسبوع، وسوف يتم تحقيق كل هذه الخدمات.

وعرض الفيلم التسجيلي، الخدمات المقدمة عبر منصة مصر الرقمية، مثل خدمات المرور وتجديد رخصة السيارة ودفع المخالفات وكذلك خدمات التوثيق وخدمات الأحوال المدنية وخدمات التموين وتفعيل البطاقات التموينية، وكل هذه الخدمات ضمن مجوعة من الخدمات مثل خدمات التأمين الاجتماعي وغيرها من الخدمات، فضلا عن خدمات المحاكم، وقريبا سوف يتم توفير خدمات أخري خلال الفترة المقبلة، بسهولة من خلال تسجيل الرقم القومي ورقم المحمول، ويمكن الاستفادة منها عبر مكاتب البريد أو تحديد المكان والتوصيل إلى عنوان المنزل، ويمكن التواصل عبر رقم الخدمة الخاص بالمنصة.
افتتح الرئيس عبد الفتاح السيسي، عددا من المشروعات الرقمية، وكان أبرزها 3 محطات للإنزال البحرى بمناطق رأس غارب والزعفرانة، وسيدي كرير، كما افتتح الرئيس السيسي، أيضا مركز البيانات الإقليمي للشركة المصرية للاتصالات في القاهرة، ومدرسة التكنولوجيا التطبيقية للاتصالات وتكنولوجيا المعلومات بمدينة نصر، ومتحف البريد المصري بالقاهرة بعد تطويره.

وشدد الرئيس عبد الفتاح السيسي، على أهمية تغيير ثقافة التعليم، قائلا: "هنشوف في الفترة التانية مجموعة من الشباب في أعلى مستوى ده بنستهدفه.. لكن واحنا رايحين في التعليم ده اللى بنتكلم فيه.. ثقافة التعليم اللى احنا ماشين بيها وليس مناهج التعليم محتاجة تطوير وتعديل".

أضاف الرئيس السيسي: "كل هدفكم ان الأولاد يبقوا معاهم شهادات وبعدين ميبقاش ليهم فرص عمل.. الجميع عليه مسؤولية.. الإعلام والحكومة والأسر.. علشان نبقا فاهمين ان نبقا عندنا فرص حقيقة وماشيين فى مسار.. لكن التعليم مبيحققش المطلوب".
تحدث الرئيس السيسي عن فرص العمل الحقيقية في المستقبل، مضيفا: "اللى احنا محتاجينه نبقا مقتنعين أن المستقبل وفرص العمل الحقيقية، وأسماء العلوم قد تكون غريبة عليكم.. الناس تقولك هعلم ابنى إيه؟.. هو ده المستقبل الحقيقى والتعليم الحقيقي".

وتابع الرئيس السيسى: "بشوف مثلا بنبقا أحيانا مقصرين في الإعلان مش الدعاية.. ولكن إزاى أسوق الكلام المهم للدولة، شوفت مثلا برنامج إسمه "الدوم".. لما البرنامج اشتغل اده فرصة كبيرة لمهارات شباب وشابات مصر في كل مناحى مصر.. أتاحنا لهم منصة.. والكلام ده أتاح شكل من أشكال التسويق للفكرة".

وأضاف الرئيس السيسي: "مقدرش أعمل برنامج زى ده للموضوع ده، مجبش الولاد والشباب والبنات اللى تميزوا في هذا الأمر، والقي الضوء عليهم علشان أخلى النشء اللى طالع يبقا عنده الحلم ده.. المقارنة دايما بتبين حالة المستوى".

وأكد الرئيس السيسي، أن المصريين مهتمون جدا بالتعليم.. متابعا: "الاسر اللى بتاخد ولادها في الدروس اللى بتديلهالها ده بيعكس وعى مصري مجتمعي بالتعليم.. عايزك تهتم بس في الاستهداف بدل ما فقط عاوز تركز مع الطلبة على انه ياخد شهادة.. التليفزيون كوسيلة فيه برنامج اسمه العباقرة استطاع خلال سنوات قليلة يلقى الضوء على حاجة معينة".

وتابع الرئيس السيسي: "كل ما ادور التليفزيون ألاقي المطبخ.. انا مش ضد.. هاتوا حاجة كده وحاجة كده.. علشان ننقل ونقدر نغير الثقافة للمواطنين.. احنا بنتكلم كده وقعدنا ولسه هنتكلم تاني.. علشان لازم نغير الواقع اللى احنا فيه .. انتوا بتتكلموا على الأكل؟!.. احنا مستنيين حد يعلمنا ناكل".
أكد الرئيس عبد الفتاح السيسي، أن الدولة المصرية لا تملك ثروات، قائلا: "معندناش ثروات.. وبقولكم كلكم.. علشان محدش يتوهم أنه في الدولة المصرية ثروات.. جبت شيخ التنقيب وكان عنده 85 سنة.. بقوله ايه اخبارنا على خريطة الثروة المعدنية؟.. قالى عندنا 3 حاجات.. وأنا لما بتكلم عن ثروة يعنى حجم هائل.. وعلشان يبقي عندك كميات كبيرة تمثل دخل ريعي.. واللى عندنا رمل ورخام وحجر جيري.. وكل الناس المعنية بهذا الأمر يردوا عليا ويقولوا غير ده".

أضاف الرئيس السيسي": "مفيش غير العمل وتدور على الأفكار وتطورها وتشتغل عليها علشان تغير حياة الناس وتعظم دخولها.. ماشيين بالمسارات اللى بتعبروها جيدة مش كافية.. لان عدد السكان كتير والطلب لتحسين الدخول كبير".
قال الرئيس عبد الفتاح السيسي، إن دخل المواطن في مصر ليس كبيرا، قائلا: "دخول المواطن المصري بصفة عامة مش كبيرة.. وبالتالي الناس تشعر باي ضغط في الأسعار.. أنا عارف ان الظروف صعبة.. إما نلغي الكلام ده كله ونضيع مستقبل البلد.. وألغي أى تطور كبير.. وإما تيسير ما أمكن.. كنت بنتكلم مع الدكتور علي المصيلحي وزير التموين.. هاجموك على الرغيف المعدل ويتم دراسته.. طب انتوا قولتوا للناس أن رغيف الخبز بيتكلف 75-80 قرش واللى بيتباع ب 5 قروش".

أضاف الرئيس السيسي: "أنا بكلم المواطن المصري وبكلم بلدنا.. والناس اللى حملتنا الأمانة على نفسها ومستقبلها.. مش اقصد أي حاجة.. أنا بتكلم عن أهلي وناسي.. أتمنى أن اعمل لهم احلي حاجة في الدنيا.. مش انا بس.. أي انسان مخلص في الحكومة وفى أي قطاع.. الدخول البسيطة مش هنقدر نعدلها إلا بعمل وعمل محترف.
تحدث الرئيس عبد الفتاح السيسي، عن جهود الدولة المصرية في البناء والتطوير، قائلا: "بكلم المصريين يعرفوا ازاي تعمل دولة.. طب مفيش فلوس.. طب خليها كده.. الدكتور أحمد زويل قالى هجيب التبرعات.. جابلي 500 مليون جنيه.. وبعد كده تعب فى رحلة علاج وتوفي.. طب نسيب الجامعة مش تتعمل؟!.. هل سبناها.. والمرحلة الثانية 95 % خلصت وخلص مع الهيئة الهندسية 5%.. علشان نوري المصريين اللى بيتعمل في البلد دي".

وأضاف الرئيس السيسي: "اللى بيتعمل في مصر أمر غير مسبوق.. ومعمول بالله.. وليا الشرف والعزة وكل الرضا على دعم ربنا.. انى اقدر اعمل الكلام ده".
وأوضح الرئيس عبدالفتاح السيسي، أن الكتلة الغالبة من المصريين يشتركون في عمل "جمعيات" من أجل الإنفاق على الدروس الخصوصية، متابعا: " ثقافة التعليم واهتمام الأسر تتغير علشان نعطى تعليم حقيقى.. حبيت أقول ليه أمام أولادنا وبناتنا عملنا ما يمكن.. كده كده بتعملوا الجمعيات علشان تصرفوا على الدروس الخصوصية.. احنا كلنا مصريين بسطاء يعني الكتلة الغالبة كده.. ممازحا الدكتور مصطفى مدبولى رئيس الوزراء: "مش بتعمل كده يا دكتور مصطفى ولا انتوا معالق الدهب ولا ايه؟ ..انا بضحك مع الدكتور مصطفى".

وأضاف الرئيس السيسي: "لبناء دولة ، الطريق بيبقا كله صبر وعمل وتضحيات.. مفيش حاجة تقدر تعملها وانت مبتجريش الجرى ده".