كنباوي وكنباوية.. حلقة رقم (101).. مرسي يطلب العفو والسماح من السيسي زين الملاح

كنباوية تدخل حجرة نومها لتوقظ كنباوي الذي راح في النوم وأذان المغرب على وشك أن يرتفع في مساجد وبيوت الله معلنا إفطار المسلمين الصائمين
كنباوية: قوم ياراجل كفاياك نوم بطل وخم المدفع حيضرب ناقص 5 دقايق على الأذان.
كنباوي: ياكنباويه جسمي مكسر وواجعني مش قادر أقوم
كنباوية: طيب قوم وأنا بعد الفطار حدعكلك جسمك وأعملك مساج
كنباوي: مساج الخير
كنباوية: مساج النور ياخويا يلا قوم خد لك دش وفوق كده وأنا حدخل أجهز الفطار على السفرة وانت معدي رايح الحمام ازعق على العيال صحيهم من النوم أنا مش عارفة بيت ايه ده اللي كله خم نوم وبيقضوا الصيام نوم.
كنباوي: قولي يا باسط ياكنباويه، قولي يا باسط.
كنباوية: يا باسط ياكنباوي
كنباوي: ايه آخر أخبارك؟
كنباوية: عملالكم كفته بالرز ومحشي فلفل وبتنجان وفراخ محمرة
كنباوي: أنا مش قصدي أخبار الأكل أنا قصدي أخبار البلد
كنباوية: أخبار البلد مفيش جديد الوزارة الجديدة شغالة والجيش منتشر والإخوان وجع دماغ في رأس السيسي والشعب والطرق والكباري
كنباوي: وبعدين معاهم مش ناويين يجيبوها البر؟
كنباوية: مش حيتلموا إلا لما يتقبض على العريان والبلتاجي وحجازي
كنباوي: فيه إشاعة بتقول إن المرشد هربوه بره مصر ودوه ليبيا والله أعلم إذا كانت الإشاعة دي حقيقية ولا فشنك وجس نبض
كنباوية: بيقولوا إن مرسي طلب أنه يقابل السيسي والسيسي رفض طلب مقابلته راح كاتب له جواب قال له فيه خلاص طالما اخدتم الحكم سيبوني أنا وعيالي وأسرتي نخرج بره مصر وأنا أوعدكم إني أقول لمتظاهري رابعة إنهم يرجعوا بيوتهم وخرجوا أعضاء الجماعة المعتقلين من السجون ومفيش داعي من الملاحقة وسيبوهم في حالهم والسيسي رفض الطلب جملة وتفصيلا
كنباوي: عنده حق يرفض الطلب ده مرسي تعبان إخواني حد عارف لو خرج ايه اللي ممكن يحصل ما الطينة ممكن تزيد بله لو خرج والناس تستقوي بيه من تاني حبسه أحسن وبعدين الشعب عاوز يحاكمه زيه زي مبارك اللي غلط يتحاسب على غلطه ومرسي غلط في حق مصر في موضوع التخابر وفي حق الشعب في موضوع الاعتقالات والاقتصاد اللي انهار في سنته السودة إيه كل ده مالهوش حساب لازم طبعا يتحاسب ويتقدم للمحاكمة كمان وياخد جزاء عمله
كنباوية: فكرك محاكمته حتبقي علانية زي محاكمة مبارك؟
كنباوي: الله أعلم بس ياريتها تبقي علانية علشان اللي جاي بعده يتعظ من أن اللي بيغلط في مصر بياخد جزاءه حتي لو كان رئيس جمهورية
كنباوية: أنت حتفضل ترغي كده كتير ومش حتقوم تاخد دش ناقص دقيقتين على المغرب وأنت معطلني وأنا لسه ماحضرتش الأكل على السفرة يلا قوم ونبقي نكمل كلامنا بعد الفطار قوم بلاش كسل وبطل تجرجرني معاك في الكلام والرغي مش وقت رغي ده.
كنباوي: حاضر أنا قايم اهه اسبقيني انتي
كنباوية: طيب يلا
كنباوي: حاضر وآدي قومه استعنا على الشقا بالله
كنباوية: شقا ايه ياراجل اللي يشوف كده يقول انك قايم تحارب أو نازل الشغل مش قايم تستحمي وتاكل
كنباوي: ما الحموم شقا والأكل شقا ماهو الواحد بيتعب من كتر تحريك بقه كل شويه
كنباوية: خلاص كل بالراحة وماتلغش ياراجل يامرفه يا اللي عايز حد يأكلك في بقك
كنباوي: والله من زمان ماعملتيهاش ياكنباويه واكلتيني في بقي
كنباوية: طيب قوم وأنا حعملها وأكلك النهارده في بقك
كنباوي: إذا كان كده حقوم جري يلا بينا
كنباوية: شوف الراجل اللي عايز يتدلع ماشي يا سيدي هو أنا ليا بركة غيرك حدلعك وادلع أمك بس أنت قوم.
كنباوي: أنا قومت خلاص يلا بينا
كنباوية: يلا ياكنباوي!