غراب البين يكتب: أصحاب ولا أعز

واقف أنا فوق سور بلكونة الست أم ممدوح اللى بتخاف على نفسها من لفحة البرد وطول فترة الشتاء تلاقيها قافلة شيش البلكونة ومتكلفته بحوالى 2 طن هدوم حتى حبل الغسيل لا تستخدمه إلا كل شهر مرة.. وعم الحاج علوان أبو ممدوح سايبها وقاعد تحت البيت على المقهى أسفل البلكونة تمامًا ولا يصعد إلا عند النوم
معذور عم علوان الغلبان.. هيروّح البيت ليه ومراته لابسه 2 طن هدوم يعنى مابيشوفش حتى لون أرجلها ولا بيعرف شمالها من يمينها
المهم إنى انكمشت داخل ريشى ولسه هحاول أنام زى كل يوم فسمعت حوار بين عم علوان و2 من شباب الحته حول الفنانة "منى ذكى" ودورها فى فيلم "أصحاب ولا أعز"

عم علوان رامى ودانه وبيسمع من الشباب تفاصيل الفيلم ومنبهر باختلافهم حول مشاهد الفيلم فأحدهم يقول الفيلم بيناقش قضية مهمة وشايفه عادى والآخر رافض الفيلم ويوجه اللوم لمنى ذكى وعم علوان وكل شوية يسألهم: هى خلعت الملابس الداخلية؟!.. طب يعنى إيه مثليين دى؟.. طب انتم شفتوها وهى بدون ملابس داخليه؟!
إلا أن الشابان ردو عليه بصوت واحد: احنا ماشوفناش الفيلم أصلا يا عم علوان
عم علون نظر لهم باستغراب قائلا: أمال بتتخانقوا ليه يا شوية مراكيب؟

وهنا وقفت على قدماى ونفشت ريشى وأخذت أنعق باعلى صوتى قاق قاق فقام عم علوان ومعه الشابان ليهشوننى ويقولون لى غور من هنا يا غراب البين جبتلنا النحس والفقر.. فهربت مسرعا قبل أن يحدفونى بالطوب ولسان حالى يقول: بقا يعنى انا اللى جايبلكم النحس والفقر يا شوية متخلفين؟.. يعنى هو دا أول فيلم يناقش مشكلة الشذوذ الجنسى؟!.. يعنى نسيتوا عمارة يعقوبيان واللى كان بيحصل فيها؟
وثانيا تعالولى هنا.. طيب ماهو انتم كبنى آدمين عندكم مشاكل وفضايح أكبر من كدا وصفحات السوشيال ميديا بتاعتكم بتنشرها كل يوم وانتم ودن من طين وودن من عجين!
أما ثالثا بقا فأراكم تتركون معظم البلاوى اللى فى الفيلم ومركزين على الشذوذ بتاع المثليين.. مع إن الفيلم فيه راجل بيخون مراته مع مرات صاحبه.. وواحد تانى بيخون مراته مع عيله صغيره
وكل دا كوم والست اللى بتزعل من زوج صاحبتها لما تكتشف انه بيخونها مع سكرتيرته دى كوم تانى.. قال يعني هى مش بتخون صاحبتها ولا بتخون جوزها!

طبعا كل ده ما ينفعش نركذ عليه انما الراجل الشاذ لأ ده ما ينفعش يكون عادى قال يعني التيك توك واليوتيوب مش مليان بلاوى من دى.. دا انتم عندكم ستات بتعمل روتين يومى على اليوتيوب والفيس علشان تعرض لكم خليفيتها الملفوفة وانتم مبسوطين وساكتين وعاملين أعلى مشاهدات ولا نسمع أصواتكم إلا فى المواضيع اللى عامله ترند.. ماهو كل دا برضو بيؤدى فى ااغلنهاية للشذوذ يا شوية بنى آدمين.. ياخى جاتها ستين ألف نيلة اللى عايزه تخلف بنى آدمين زيكم يابتوع الترند والمهيصة!
غراب البين