غراب البين يكتب: لماذا لا يتم تأميم كافة القنوات الفضائية؟!

واقف أنا فى حالى أعلى سور مدينة الإنتاج الإعلامى وماحدش واخد باله منى خالص.. علشان الإعلاميين وزوار المدينة معظمهم ينظر أسفل قدميه ونادرًا ما تجد بينهم من يرفع رأسه عاليا كى يرانى
المهم وبعيدا عن الفلسفة بتاعة أُمى.. سمعت واحد منهم بيقول للتانى: هو احنا هنتناول قضية "محمد الأمين" مع فتيات الملجأ فى البرنامج الليلة ولا نعمل نفسنا من بنها؟!
فقال له الثانى: ياعم متنساش إن الراجل هو صاحب القناة وأصلا لسه ما أخدش حُكم.. احنا نعمل نفسنا من بنها.. ولا أقولك.. انا هقول إنى عندى كورونا وهعتذر عن عدم تقديم البرنامج يومين تلاته حتى تهدأ الدنيا ونعرف راسنا من رجلينا
الأول: أخذ يضحك بصوت عال وقال لزميله: الله يحرقك هتموتنى من الضحك!
وهنا أخذت أرفرف بأجنحتى وأنعق بأعلى صوتى قاق قاق.. فرفعوا رؤوسهم لأعلى وأخذوا يهشوننى ويقولون فى صوت واحد: غور من هنا الله يحرقك يا غراب البين انت اللى جايب لنا الفقر عالصبح
فأخذت ذيلى فى أسنانى وقلت يا فكيك قبل أن يحدفونى بالطوب كعادتهم ولسان حالى يقول: أنا برضو اللى جبتلكم الفقر ولا انتم اللى جايبين الفقر للبلد كلها بطرمختكم على كل ما يسئ لكم ويقف ضد طموحاتكم
يا شوية بنى آدمين ياللى بتيجوا على اليتامى والمساكين علشان تحافظوا على مكاسبكم الخاصة.. دا لولا السوشيال ميديا مكانش حد عرف حاجة.. ولولا حيادية النائب العام وإخلاصه وسرعة تناوله للقضية مكانش حد عرف حاجه
وطالما الإعلام وقنواته ملكًا لأمثال هذا الامين سيظل إعلامنا على قدر مستواكم المتواضع.. دا أنا لو كنت بنى آدم زيكم كان زمانى بطالب الدولة بتأميم كافة القنوات الفضائية حرصا على المصداقية.. جاتها ستين ألف نيلة اللى عايزه تخلف بنى آدمين زيكم!
غراب البين