غراب البين يكتب: هو ليه مافيش انتماء عند لاعبى المنتخب المصرى؟!

واقف انا على سور المدرسة لا بيا ولا عليا وبستمتع بأشعة الشمس بتاعت ربنا وبتفرج على العيال وهما بيحيوا العلم فى طابور الصباح.. بصراحة معجبنيش الأداء بتاع الأولاد فى تحية العلم.. تحس إن عبارة "تحيا جمهورية مصر العربية" مش طالعه من قلوبهم.. بعكس التلاميذ بتوع زمان اللى كنت بتفرج عليهم وانا لسه غراب صغير لم أبلغ الحُلُم

انتهى الطابور والعيال دخلوا الفصول ومعهم المدرسين.. ولم يتبقى فى حوش المدرسة سوى سيادة الوكيل ومعاه الاخصائى الإجتماعى ومعاهم الأستاذ احمد بتاع الألعاب.. وبدءوا يتناقشون فى مبارايات كأس العرب
طبعا الاستاذ احمد بتاع الالعاب زملكاوى.. علشان كدا شايف إن السولية وشريف المخيف هما اللى ضيعوا المنتخب
وطبعا السيد الأخصائى الإجتماعى الأهلاوى لم يعجبه الكلام فرد عليه قائلًا: دا مصطفى فتحى بتاعكم انفرد بالجون مرتين وبرضو ضيعهم.. هو المنتخب بدون لاعبى الاهلى هيبقى منتخب؟!.. هو انت بتفهم فى الكورة اصلًا؟!.. وعاملى فيها بتاع ألعاب!
المهم كلمة من هنا وكلمة من هناك وهبا شتموا بعض ووكيل المدرسة رغم انه اهلاوى ومش عاجبه كلام الاستاذ بتاع الالعاب إلا انه حاول يكون العنصر المتعقل لكنه فشل

وهنا نفشت ريشى وأخذت انعق بأعلى صوتى قاق قاق فنظروا جميعهم نحوى وأخذوا يهشوننى ويقولون لى: غور من هنا يا غراب البين انت اللى جايبلنا الفقر عالصبح
فأخذت زيلى فى أسنانى وقلت يا فكيك ورحت ابحث عن مكان اكثر هدوءا لأتشمس فيه.. لكن لسان حالى كان يقول لهم: بقى انا اللى جايبلكم الفقر والنكد يا شوية بنى آدمين؟!.. دا ناقص كمان تقولولى إنى انا سبب هزيمتكم فى من تونس ومن قطر
طالما انتم بتصنفوا لاعبى المنتخب اهلاوى وزمالكاوى يبقى منين اللاعيبة هيكون لهم انتماء للمنتخب؟!.. إزاى هيبقوا إيد واحده؟!.. انا دلوقتى فهمت إيه السبب فى إن التلاميذ بيقولوا تحيا مصر من غير روح
علشان المدرسين اصلا مشتتين وانتمائهم لجماعاتهم المحدودة وليس للوطن الأكبر
وبتقولوا عليا انا اللى جايبلكم النكد والفقر؟!.. ياخى جاتها ستين ألف نيله اللى عايزه تخلف بنى آدمين عالصبح!
غراب البين