غراب البين يكتب: البنى آدمين جرالهم إيه

هو إيه اللى بيحصل للبنى آدمين اليومين دول؟!.. أو تقدر تقول فى الكام سنة اللى فاتوا.. أو بالتحديد من بعد 2011 لأنهم فى هذا الوقت بالتحديد بدأوا يعرفون السوشيال ميديا ويتنقلون بين روافدها رويدا رويدا _عجبتكم رويدا رويدا دى طبعا لأنكم أول مرة تشوفوا غراب بيكتب بالفصحى بتاعتكم_ حيث عرفوا الفيس بوك ثم تويتر وأصبح اليوتيوب مصدر رزق لمعظمهم

أنا إيه اللى بيخلينى اكتب الكلام ده؟!
امبارح بالليل واقف لا بيا ولا عليا فوق كشك السجاير بتاع الواد سوسته وإذا بى اسمع حوارا فى منتهى العجب
الزبون بيطلب علبة سجاير من سوستة ويقول له ازيك يا بتاع شيماء
فالأخ سوستة رد عليه قائلا: والله بفكر اعمل فيديو للبت ولاء وفى الآخر اطلع بدور على علبة سجاير وأكيد هيعمل مشاهدات بالملايين.. يعنى هو سوسته بتاع البط والوز احسن من سوسته بتاع السجاير؟

الزبون رد عليه ساخرًا: والمواقع الإخبارية تجرى وراك وتعمل معاك بث مباشر والإعلام يستضيفك فى أكبر القنوات.. ليه لأ.. توكل على الله
وهنا نفشت ريشى وأخذت أنعق وأقول قاق قاق بأعلى صوتى فخرج سوسته من الكشك وأخذ يهشنى ومعه الزبون الملعون ويحدفوننى بالطوب ويقولون غور من هنا يا غراب البين يا فقرى جبتلنا النحس

وأنا طبعا قلت يا فكيك ولسان حالى يقول: هو إيه اللى جرى للبنى آدمين.. السوشيال ميديا جننتهم.. ومشاكلهم اللى بينشروها أكتر من مشاريعهم.. إشى أم سايبه إبنها للامراض والتشرد علشان تعيش حياتها مع زوجها الجديد.. وإشى أب يجوب الشوارع يبحث عن مأوى بعد أن لفظه أبنائه.. وإشى ناس كتير قاعدين على الفيس وتويتر بيناقشوا كل البلاوى دى وبينقسموا ما بين مؤيدين ومعارضين لقرارات هانى شاكر وانتصارات مطربى المهرجانات
وآخرون يناقشون مآسى الأمهات والآباء وأبنائهم دون أى فائدة تذكر على مجتمع البنى آدمين
قال وبيقولوا عليا أنا غراب البين وجايبلهم النكد والفقر.. ياخى جاتها ستين ألف نيله اللى عايزه تخلف بنى آدمين!
غراب البين