غراب البين يكتب: إعلام التيك توك وصحافة السوشيال ميديا

قاعد على سور بوابة مدينة الإنتاج الإعلامى لا بيا ولا عليا دون أن أنعق ولا أقول "قاق قاق" ومكرمش جناحاتى تحت باطى وبتفرج على المزيعات والمزيعين اللى داخلين طالعين
وإذا بى أسمع المزيعه وهى داخله وبتتكلم مع رئيس تحرير البرنامج بتاعها وبتقوله: مش ملاحظ إن أخبارنا كلها من التيك توك والسوشيال ميديا؟!،، فقال لها: أمال يعنى هنجيب اخبار منين.. فقالت له أمال المعدين اللى معاك شغلتهم إيه؟!.. فقال لها: بيتابعوا السوشيال ميديا ويجهزولنا الفيديوهات اللى عامله تريند.. هو انتى فاكره البرامج زى زمان بتعتمد على المراسلين ومندوبى الوزارات؟!

قالت له: يا سيدى أهم كلمتين قلتهم من نفسى.. أنا أصلا جايبالك شوية تريندات معاى وصور من الإنستجرام هنعمل بيهم أحلى شغل.. أنا بس حاسه اننا بنكلم الناس عن حاجات هما شافوها فى السوشيال ميديا زينا تمام يعنى مش بنجيب جديد!
فقال لها: دا حتى الصحافة والمواقع الإخبارية بتعتمد على تغريدات المشاهير فى تويتر وبقت بتنشر بوستات زى بتوع الفيس بوك.. إنسى صحافة وإعلام زمان يا نجمتنا.. دلوقتى الصحفى أو الإعلامى بيعتمد على البيان اللى بيجيله من الوزارة وعلى التريندات وفيديوهات البث المباشر.. الصحافة بتاعة زمان خلاص بح.. رُفعت الجلسة

الصحفى دلوقتى ماعندوش مصادر زى زمان.. مصادره هى لينكات صفحات المشاهير على تويتر والفيس والإنستجرام.. زمان كان الصحفى أو الإعلامى بيصاحب الوزراء والفنانين ولاعبى كرة القدم وبيجيب منهم تصريحات وأخبار حصرية.. لكن حاليا بيجيب تغريداتهم وبوستاتهم دون حتى ان تكون له معهم أى علاقة من قريب او بعيد

وهنا بقى مقدرتش استحمل إنى اسمع باقى الحوار.. فوقفت على رجلى ونفشت ريشى ونعقت بأعلى صوت "قاق قاق" ولقيتهم اتفاجئوا بوجودى وبيهشونى بعصبية ويقولولى غور من هنا يا غراب البين جبتلنا الفقر!
فقلت فى نفسى: أنا برضو اللى جبتلكم الفقر؟!.. دا أى حد دلوقتى ممكن يشتغل صحفى او إعلامى ومش لازم يكون عنده موهبة او خبره ولا حتى دراسة.. بدليل ما نراه على الشاشات وعلى صفحات المواقع الإخبارية.. قال أنا اللى جبتلهم الفقر قال!.. جاتها ستين ألف نيله اللى عايزه خلف!
غراب البين