"أنا إخوان أنا مقطف بودان" تنتقد حزب الكنبة وتنشر سيناريوهات 30-6

من سيشارك في مظاهرات إسقاط النظام في 30 – 6؟ ما هي المخاطر التي ستواجه الشباب؟ أسئلة أجاب عنها أدمن "أنا إخوان أنا مقطف بودان"، في بوست لاقي إعجاب الشباب، البوست دعا الشباب للمشاركة في الفاعلية بشكل ساخر وانتقد حزب الكنبة الذي سيشارك في التظاهرة من خلف التلفاز.. "فيتو كافيه"، رصدت ما قاله الشباب..
عارف العيال اللي متربوش اللي بيشخبطوا على حيطان المترو ويكتبوا ألفاظ بذيئة؟؟! دول نازلين يوم 30-6.
عارف البنات اللي مش مؤدبة اللي بتبات برة بيتها في الميدان وبتكلم ولاد وتضرب طوب؟؟! دول برضه نازلين يوم 30- 6.
عارف العيال الصغيرة اللي بتهرب من المدرسة وتروح تلم الأزايز الفاضية من جنب الأكشاك وتعملها مولوتوف؟! دول برضه نازلين يوم 30-6.
أوعي تنزل يوم 30 -6.. ده المرشد بعت يجيب طيارات اف – 16 من حماس عشان تضرب المتظاهرين !!
أوعي تنزل 30- 6 ده الداخلية جايبة عشروميت قناص مستني حد بس يعدي ناحية الاتحادية!!
أوعي تنزل أساسا من بيتك !! حيقبضوا عليك ! ولو بنت حيغتصبوكي في ساعتها !!
عاوز تنزل ليه ؟! خدت إيه من اللي نزلته قبل كده ؟! ولا مستني تاخد إيه ؟! انت فكرك الإخوان حيسبوها كده !! يا جدع ده الدم حيبقي للركب !!
عاوز تنزل تحصل جيكا وكرسيتي وأبو ضيف !! وتخلي أمك تبكي عليك زي أم الجندي !!
يا راجل كبر مخك.... انت مش بتاكل TODO الجديد وبتشرب كوكولا وتبص على الغطا يمكن تكسب إزازة تانية وبتتفرج على باسم يوسف وإبراهيم عيسي وكمان بتشوف arab idol وبتضحك لما تشوف أحلام بتقول "كنطاكي" !! عاوز إيه تاني... ريح في بيتكوا...
لا بجد ريح في بيتكوا... بلا وجع دماغ، عالم هايجة عاوزة تعمل أي منظر وخلاص... ريح في بتكوا كده وافتح on tv افترج بمزاج وانت لابس الحتة القطونيل والفلانة الجيل الملونة..
لا بجد ريح في بيتكوا.. سيب الرجالة ينزلوا يخلصوا الليلة وانت ابقي انزل بعدها فرقع بلالين تحت العمارة.