إسماعيل ياسين في سوق السيارات: خللوها.. ولو بارت ابقوا اركبوها

إسماعيل ياسين في وزارة البيئة: ياخواتي حكومتنا نساية.. وحكايتي وياها حكاية
عشمونى بالحلق خرمت أنا ودانى.. قال إيه يا خويا الحكومة صحيت من النوم، فقالت لما نفرح الشعب الغلبان بخبر حلو.. قوم إيه أعلنت عن انخفاض أسعار السيارات، وقالت مافيش جمارك وإننا هنشترى العربية بالسعر الأوروبي.. يعنى بتراب الفلوس.. والحكومة حلفت 100 يمين إنها عملت اتفاقية مع أوروبا إنها هتبيع العربيات للمواطنين في مصر بالسعر اللى في أوروبا.
وأنا من تغفيلى صدقتهم.. آه وحياة شلاضيم بُقى صدقتهم.. خصوصا بعد تأكيد نوابنا على كلام الحكومة.. لكن يا فرحة ما تمت خدها الغراب وطار.. وأتارى يا سومة نوابنا مأنتمين مع الحكومة.. وبيرددوا كلامها عمال على بطال وبدون مناقشة، وأتارى أصحاب معارض السيارات والمستوردين لهم رأى تانى غير رأى الحكومة والنواب خالص مالص.. وشايفين إن قواعد السوق حاليا لا تسمح بخصم أسعار الجمارك من السيارات.. يعنى هما يستفيدوا بقرار صفر جمارك، وبرضه يبيعوا لنا العربيات بالسعر اللى يعجبهم ويرضى طموحاتهم في المكاسب اللى اتعودوا ياخدوها، وأنا من غباء شلاضيمى كنت مصدق تصريحات الوزراء وقلت أمك داعية لك يا واد يا سُمعة وأخيرا هتركب عربية.. لكن أتارى تصريحات الوزراء لها مواصفات خاصة، وتحتاج إلى مواطن طويل وأهبل ولابس طرطور وبيصدق الحاجة حتى لو شايف عكسها بأم عين اللى جاب أبوه.. مواطن مالوش شلاضيم زى شلاضيمى.
أنا دماغى هتدشدش ولا أدرى ماذا أفعل وماذا أعنى.. نفسى حد يقولى فين أم الرقابة على الأسواق اللى المفروض تنفذ أم الاتفاقية وتضبط أم الأسعار.. آه يانى لو حد يلايمنى على الفواتير اللى بيستوردوا بيها السيارات من أوروبا، علشان افرجكوا على الفضايح.. واعرفكوا إنهم ببيعوا العربيات بضعف سعرها اللى بيستوردوه بيها.. يا سيدى أنا ماعنديش مانع إنك تكسب وتاكل عيش.. بس متحفش قوى بالشكل ده.. واتقوا ربنا بقى بدل ما ربنا يولع فيكم وكفاية جشع.. ده الرزق بيحب المشاركة مش الحف.. ولا أقولكم: "إحنا بقى مش هنشترى إلا بزيرو جمارك أما أنتم فخللوها.. وإن بارت ابقوا اركبوها".. ويلا بقى دعونى أنقشع.. سلامو عليكوووووووووووووو