إسماعيل ياسين في نادي الأهرام: بركاتك يا تركى آل شيخ

نادي الأسيوطى باعوه يا رجالة وبقى اسمه نادي الأهرام.. يعنى بدلا من أن أنادى على مشجع النادي وأقوله تعالى يا أسيوطى.. هقوله تعالالى يا هرم.. آه والنبى زمبقولكم كده..
آه يانى يا شلاضيمى يانى يابا.. وأخونا الكابتن "أحمد حسن" راسه وألف سيف ما يقولش على اسم الراجل اللى اشترى النادي وغير اسمه من الأسيوطى للأهرام.. وبيشترى في اللعيبة بأغلى الأسعار.. قال يعنى ده سر حربى وصاحبنا بيحافظ على الأسرار.. طب وعدى يا وعدى على الأسرار.. وأسفا على عقلى الذي طار.
ومن عجائب القرن أن الصفقة الكبيرة غيرت شعار النادي الأهلي من "الأهلي فوق الجميع" إلى "ياللى ماشفتش خيبة تعالى اتفرج هنا على خيبتى".. ونادي الزمالك بقى بيكاكى ويقول "آه يانى يا مُصيبتى يانى".. والمصرى والإسماعيلى مش هيتنافسوا على المركز التانى والتالت.. لأن ده هيبقى من نصيب الأهلي والزمالك بعد فوز الأهرام بالدوري.. والكابتن "حسام البدرى" رافع شعار "والنبى لنكيد العزال"..
يا حلاوتك يا سابقنا بفهلوتك.. أنا ياخواتى هتجنن من اللى بيحصل في بلدنا ده.. "نخرج من حفرة نقع في دحديرة".. وبص العصفورة واحنا نبص على العصفورة.. وفجأة نلاقى الأسعار زادت والدعم اتشال.. ده حتى أسعار لعيبة الكورة ولعت نار واترفع عنها الدعم وبقت خارج نطاق العقل والمنطق.. بركاتك ياتركى يا آل الشيخ.. يا كبير العقلاء.. لاااااااء لاااااااء..
طب وسع وسع للعقلاء.. أربط فرمل يا سواق.. خشى يا نحلة من البلكونة.. واربطى راسك بالببيونة.. نابليون جاتله الشعنونة
النادي الجديد بيجمع مشجعين بطرق لولبية يغلب عليها طابع المهلبية.. وده كله عشان عارفين طبع المصرى والمصرية.. وقال إيه بخمسه جنيه العضوية.
لأ وإيه.. ده المشجع هياخد راتب شهرى 5 آلاف جنيه.. ده غير التذاكر المجانية في كل مباريات الفريق.. وكمان رحلات طيران مجانية لتشجيع النادي في البطولة العربية والأفريقية بعد الحصول على الدوري المصرى.
طب والنبى اعتبرونى أول المشجعين للنادي.. وأهى فرصة اركب معاكم الطيارة وما أرجعش هنا تانى.. والسلامو عليكووووووووووو...