جهاد التابعي تكتب: سأنتظر الحلال

" الحمد لله بكسب من عرق جبيني بالحلال ولا ممكن أفرط في شرفي
ولا أعمل حاجة وحشة أبدا"
جملة قالتها سيدة في الخمسين من عمرها بشفتين تجمعت حولهما خطوط
الزمن ووجنتين غائرتين في وجهها ذو الجلد المتعدد الألوان، قالتها وهي تحاول شد
ظهرها المحني في فخر أمام كاميرة مصور الفيلم الوثائقي عن النساء المكافحات الذي
أظهر تأثرا بالغا لا بكفاحها بل بإيمانها وشرفها.
لكنه سألها فجأة وكأنه أفاق من غفوته: حاجة وحشة زي ايه يعني يا
حاجه اللي ممكن تعمليها؟
- يعني ممكن بدل منا واقفه في البرد كده أبيع خضار ممكن أنحرف أو
أروح أعمل حاجه غلط مع حد ويديني فلوس كتير.
-هههههههههههههههههههههههههههههه لاء يا حاجة لاء انتي متقدريش
تعملي كده سواء عايزه أو مش عايزه، الموضوع مش باختيارك أصلا، بلاش يا حاجة تدعي
إنك أنتي اللي متنازلة عن الحرام، ده الحرام هو اللي مش هيناسبك، ايوه دي الحقيقة،
انتي ست مكافحة وراضية بالواقع بتاعك آه، ودي حاجة تحترم، بس مش لازم تتباهي بانك
متخلية عن حاجة أصلا متقدريش تعمليها، انتي متقدريش تكوني فتاة ليل سواء عايزه أو
لاء.
- معقول؟ يعني أنا مش شريفة بكيفي يابني؟ مش بمن عليكوا بشرفي
يعني؟ بجد والنبي؟
- آه والله يا حاجه صدقيني دي الحقيقة وبطلي تقولي الجملة دي لما
يصوروا معاكي المرة الجاية
- طب يعني مينفعش اتنازل عن أخلاقي وأبقي رقاصة؟
- لاء يا حاجة. احنا مش متأكدين إذا كان عندك أخلاق ولا لاء. بس
الأكيد إن لا سنك ولا لياقتك تسمحلك تكوني رقاصة أنتي مشوفتيش صوفينار وأيمي ولا
ايه يا حاجة ده الرقص بقي هندسة يا ست الكل.
- طب تاجرة مخدرات .أنا ممكن انحرف واتاجر في المخدرات عادي
- ههههههههههههههه ياختي اتنيلي. ده لازم يبقي عندك شبكة علاقات
وذكاء وتخطيط وراس مال ولازم تبقي مسنودة مسنودة ياحاجه
- يعني الانحراف مش سهل؟
- لاء مش سهل يا حاجه والله
- طيب خلاص قشطه سأنتظر الحلال