إسماعيل ياسين في سوق الملابس الشتوى: الحقنى يا عم عفركوش يا ابن برتكوش

أعوذ بالله من هذا الذي أراه.. ما كل هذه الأسعار.. دا أنا علشان أشترى هدوم شتوى ليا وللولية والعيال محتاج أبيع البيت.. لأ والنبى ياخويا دا البيت بالإيجار وما ينفعش يتباع.. آه يانى يا غُلبى يانى يابا..
المحال ترفع شعار "نحن نبيع للأعداء" ولا عزاء لأبناء الوطن الفقراء.. الحقنى يا عم عفركوش يا ابن برتكوش.. نار يا حبيبى نار.. دا أنا لو صرفت المرتب كله مش هجيب كلسونات ليا وللعيال وأمهم.. فما بالك لو فكرت أشترى جواكت وبلوفرات ولكاليك؟!
البياع بيبصلى وكأنى جاى أسرق البضاعة.. آآآآآخ ياما نفسى أدب صباعى جوا مناخيره وأفقع له عين من عيونه اللى بتبرقلى دى.. علشان يحرم يبرق للزباين اللى بتتفرج وتسأل عن الأسعار وماتشتريش!
طب ما هو كلنا بنسأل ومانشتريش.. إيه الغريب في كدا.. طب هي دى أسعار ممكن نشترى بيها؟!.. ليه هو إحنا كُفار يا جدع ولا إحنا كُفار!!
أين أنتِ يا هيئة الرقابة على الأسواق.. يا ساكنة بلاد الواق واق.. وعاملة نفسك من بنها مش من بولاق.. الحقنى يا بوليس النجدة والنبى واشتريلى جاكت شتوى دا البرد هيموتنى.
عقلى يكاد أن يتوقف عن العمل.. رجعولى عقلى والنبى.. دا إحنا بنقول عشانا عليك يا رب، وسيادة البياع مصمم إن أسعار الجواكت تبدأ من ألف جنيه وأنت طالع.
إلهى تطلع روحك من لغاليغك يا جدع.. أنا أعصابى خلاص بقت تعبانة.. مش عارف ألاقيها من أسعار الهدوم الشتوى ولا ألاقيها من أسعار البطاطس والفول اللى زادت 3 أضعاف سعرها بدون سابق إنذار وبدون أي مبرر يقنعنى أو يقنع أصغر عيل من عيالى.
إننى أشعر بالانحطاط.. آه والنبى دا أنا عندى انحطاط في المُخيخ.. دماغى هتدشدش ولا أدرى كيف سيمر هذا الشتاء.. طب وحياة شلاضيم بُقى إحنا محتاجين الفانوس السحرى علشان نعرف نشترى هدوم الشتوية.
إذن لا بد أن أنقشع من هذا السوق.. نعم سوف أنقشع علشان العفاريت بدأت تلعب في وشى النطة.. يلا بقا.. سلامو عليكووووووووووووو