أنا مش بحب الصب في مصلحتى إلا يوم الخميس

آه يا دهوتى السودة يانى يابا.. إنها هزولت وزبولت وتنيلت بستين نيلة.. حتى الصب في المصلحة لم يأت في موعده هذه المرة وجاءنا بشكل مفاجئ.. آه يابُقى يانى يابا.. ياتُرى ويا هل تُرى ماهى الأسباب التي جعلت وزير البترول يصب في مصلحتنا يوم السبت وليس يوم الخميس كما تعودنا من باقى زملائه وزراء الحكومة.. فهل هي طريقة جديدة أراد سيادة الوزير أن يستخدم فيها عنصر المفاجأة لما فيه من متعة في استقبال الصب أم أن صحة معالى الوزير على قدها وبقا بيصب في أي وقت حسب استعداده المفاجئ؟!
إننى في منتهى الإنعياء.. حاسس بانتفاخ في شلاضيمى واهتزاز في أذنى الوسطى.. فأنا مش بحب الصب في مصلحتى إلا يوم الخميس.. آه والنبى يا خويا احنا اتعودنا على الخميس والحقنى ياعم عتريس وولعلى الفوانيس.
فلقد فاجأنى معالى وزير البترول بزيادة أسعار الغاز الطبيعى يوم السبت على غير العادة.. لأ بقا ياخويا.. ماهو مش بمزاج معاليك.. لازم تحترم رغباتى كما أحترم رغباتك.. مش كل حاجة بتيجى قفش كدا.. ماهو احنا برضو كشعب لنا أوقات بنستقبل فيها الصب بأريحية ولا بد أن تحترمها.. آه والنبى ياخويا علشان مانزعلش من بعضنا.
إنى أشعر أن أنفُخى ستتدحرج من أدمُغى اللى هتدشدش على سبعين ألف حتة بعد سماعى لتبرير المتحدث الرسمى للحكومة لرفع أسعار الغاز.. فلقد قال معاليه إن زيادة أسعار الغاز تهدف لمعالجة "التشوه" الموجود في أسعار أسطوانات الغاز".. لااااااااااا والنبى.. طب تكونش الأنبوبة حامل والطفل هينزل مشوه نتيجة إن الأنبوبة كل شوية في بيت شكل؟!
إننى أوشك على التوهان والذهاب إلى المورستان.. طب يكونش علشان الأنابيب أصبحت تعانى من كرمشة في الخدود والصدر والأرداف فقررت معاليك أن ترفع أسعار الغاز لتوفير النفقات لإجراء عمليات نفخ وشد لها على حساب الشعب؟!.. ماهو على رأى المثل.. انفخ الأنبوبة المتعوسة تلاقيها بقت عروسة.. ليليلى.. إننى سأنقشع.. السلامو عليكووووووووووووو