إسماعيل ياسين في انتخابات الرئاسة: كداب يا خيشة كداب قوى!

بصراحة أنا عايز إزازة نشادر تفوقني قبل أن "يُغمن" عليا.. أنا في منتهى "الانعياي".. عيان قوى ونفسى أتكلم.. نعم سأتكلم.. سأقول وسأحكى.. وأنت ياخويا روح لحالك وكفاية كدب ومكابرة.. وآدينا شوفنا العينة قصاد عيننا التي سيأكلها الدود.. طوابير في انتخابات الرئاسة بالخارج.. المصريين بيغنوا ويرقصوا في جميع سفاراتنا حول العالم.. وكأنهم قاعدين في ميدان لاظوغلي.. مش مهم هينتخبوا مين.. المهم إنهم نازلين.. ودا برضه نجاح للسيسي وللمصريين.
وأنت يا كداب بتكدب عليا وتقولي ما فيش حد هينزل ينتخب.. وتقولي المصريين في الخارج مشغولين بلقمة العيش ومش فاضيين ينتخبوا ولا يهببوا.. ياخى جاتك لقمة عيش تقف في زورك وتخليك تترعش وماحدش ينقذك! دا إنت طلعت ألعن من الشيطان.. وأنا صدقتك يا بتاع الإخوان.. عّمّال تكلمني من طراطيف مناخيرك، وتقولى فضيحتنا هتبقى بجلاجل قدام العالم.. ياخي أعوذ بالله منك.. آديك طلعت أونطة.. والمصريون لعبوا على وجهك النطة.
أنا بقى اللى هكلمك دلوقتى من طراطيف مناخيري ومن شلاضيم بُقى.. وهعرفك إنك كداب يا خيشة كداب قوى.. دا أنت زيك زى معتز مطر.. اللى راح تركيا مع أنه بيقبض من قطر.. ويقولك أنا مش إخوان.. وشايف إن انتخابات الرئاسة هتبقى بزرميط على بادنجان.. طب روح أنت ومعتز اتفرجوا على الطوابير في الكويت.. ولا أقولك روح السعودية كمان.. وخدلك لفة في ولايات أمريكا ودول أوروبا يا تعبان.
أقدر أقولك عن "قزنك" بقا.. علشان أنت بقيت زي دفتر أحوال البوليس.. دماغك كلها حوادث وضرب وقتل وتلفيق وهكذا.. ياريت بقى تاخد أفكارك وتنفضوا قوام من نحوا.. وهاتولى بدالكم ندابة.. أهى أرحم منكم يا بتوع الزفة الكدابة.
يا بوليس النجدة إلحقنى.. أنا دماغي هتدشدش ولا أدرى ماذا أفعل وماذا أعنى.. آه يا خراب بيتى يانى.. ياللى كنت هصدق هذا الإخوانى.. دا أنت فعلا ميكروب.. لأ دا أنت وباء.. أنت تستحق الرش بالفنيك.. أشتاتا أشتوت.. يجعل كلامى خفيف عليكوووووووو... يلا بقا السلامو عليكوووووووووووو.