إسماعيل ياسين في وزارة البيئة: ياخواتي حكومتنا نساية.. وحكايتي وياها حكاية

آه يانى يا دهوتى ياآنى يامااااااما.. الحقنى يا سيادة وزير التنمية المحلية.. أنقذنى يا سيادة البيه المحافظ.. دى ريحة الزبالة في الشوارع هتموتنى.. مدد يا دكتورة ياسمين ياساكنة الديوان مدااااااااااااد.. بركاتك ياوزيرة البيئة والنبى
عشروميت وزير للبيئة وعدونا بحل مشكلة القمامة ويا مولاى كما خلقتنى.. وقال إيه ياخويا ستنا الوزيرة بتقول إحنا درسنا المشكلة وهنبدأ في الحلول خلال السنتين اللى جايين.. والنبى إيه.. يكونش بعد السنتين هنستنى كمان سنتين علشان نشعر بتحسن؟!
اسكت يا لسانى.. اخرسى يا شلاضيمى.. ماهو جايز حضرة معالى الوزيرة مشغولة بالمؤتمرات بتاعت إنقاذ كوكب الأرض من التلوث البيولوجى.. واكيد عندها خطة لإنقاذ شوارعنا من البهدلة ولكن المحافظين ورؤساء الأحياء لم ينفذوا خطة معاليها؟!
طب وحياة شلاضيم بُقى أنا لو منهم كنت قسمت المشكلة علينا كلنا.. يعنى الوزيرة تهتم بنضافة الفضاء الخارجى.. والمحافظين ووزير التنمية المحلية يهتموا بنضافة الأرض.
عموما ربنا يجعل كلامنا خفيف عليهم.. قصدي على معاليهم.. الزبالة بقت في كل مكان.. في كل شارع.. في كل حارة.. في كل باذنجان.. لدرجة أنى أصبحت أشم رائحة الديفوناتك في كل مكان.. هق هق.. طب والنبي ماأنا عارف هو إيه الديفوناتك ولا حتى الترموماتك
إنني في منتهى «الإنعياى».. وأختنا الدكتورة "ياسمين فؤاد" وزير البيئة عاملة ودن من طين والتانية من زلابية.. وبتقولك أنا وزيرة بيئة مانيش رئيس رابطة الزبالين.. إنها تهتم بالملوثات اللي في الجو وليس التلوث اللى على الأرض.. ياخي جاني صاروخ جو أرض ياخدني من هنا ويوديني العين السخنة عند سمك القرش يقرطمني.
بس برضه هبقى ضحية البيئة المائية وساعتها الوزيرة هتقول ده مش من اختصاصي.. هع هع.. دى الوزيرة بتقول إنها هتحل مشكلة الزبالة خلال الأربعة سنين الجايين.. ومعرفش ليه كلهم بيقولوا خلال أربع سنين.. يكونش عارفين إنهم بيمشوا بعد أربع سنين فبيريحوا أدمغتهم مننا؟!
وأدينا احنا بننسى والوزيرة بتنسى والحكومة بتنسى.
ياخواتي حكومتنا نساية.. وحكايتي وياها حكاية.. ذاكرتها ضعيفة للغاية.. مش فاكرة إنها عايشة معايا
إنها حقا نساية.. وأخيرا.. سلامو عليكووووووووووووو