إسماعيل ياسين في البنك المركزي: ساحت فلوسك يا سمعمع

أنا أعصابي تعبانة.. أنا عندي انحطاط في المُخيخ.. طب وحياة شلاضيم بُقي التي لا أحلف بها كذبا أبدا وبتاتا البته إحنا شعب يستاهل المسئولين بتوعه بأفكارهم وقراراتهم الجهنمية.. قال إيه ياخويا مشاكلنا المالية كلها انتهت وبقينا بنفكر في تغيير العُملة من ورقية لبلاستيكية.. وإشي ماكينات طباعة جديدة بملايين الدولارات وإشي استيراد بلاستيك لزوم العملة وكمان كام عامل مستورد علشان يعلمونا إزاي نطبع على المكن الجديد.. ياااااااداهية دقي ووسعيلي بُقي.. لقد اقشعر بدني وأراني أشعر بالرفاهية.. إننا نحن الذين خرمنا الأوزون وضربنا التنوع البيولوجي في الخلاط.. وقال على رأي المثل: "اللي معاه قرش محيره.. يجيب بلاستيك ويطيره".. قال فلوس بلاستيك قال..
طب يعني الفلوس دي هتتعمل في البنك المركزي ولا في مصنع الهلال والنجمة؟!.. طب يكونش هيطبعوها في مصانع الشريف للبلاستيك؟!.. وبدلا من أن أقول ضاعت فلوسي هقول ساحت فلوسي؟!.. إنني أشعر بالإنعياي.. ساحت فلوسك يا سمعمع.. إلحقني يا عفركوش يا ابن برتكوووووووووش
طب يا ترى ويا هل ترى هذا الجنيه البلاستيك سيوجد منه ألوان أم أنه أبيض وأسود.. أم أنه سيكون عبارة عن "مارك" زي اللي عند بتاع العصير؟!.. هو إحنا ياخواتي في البنك المركزي ولا بنك الحظ.
طب يكونشي هي دي مواكبة التطور التكنولوجي اللي بيقولوا عليها؟! قال إيه بيقولك إن العملة الورقية المصرية جار عليها الزمن ولم تعد صالحة للاستخدام.. طب ياخويا ما هو أنتم اللي عومتوها وبهدلتوها وودتوها في ستين ألف داهية.
طب حتى لو الفلوس البلاستيك عمرها الافتراضي 5 أضعاف الفلوس الورقية.. هو مين أصلا بيشيل فلوس علشان يدور على عمرها يطول أو يقصر.. دا اللي جاي على قد اللي رايح.. دا إحنا بنخلص مرتب الشهر الجاي قبل أن يبدأ أصلا.
هو إحنا عايزين نبقى زي كندا وأسترالية ونشيل فلوس بلاستيك؟.. طب دي ناس عندها فائض عايزة تحافظ عليه.. لكن إحنا بنكمل عشانا نوم يا ولداه.
آه يا أدمُغي ياني يابا.. إنني سأكتفي بهذا القدر من اللاشيء حتى إشعار آخر.. يلا بقا.. سلامو عليكوووووووووووووو