إسماعيل ياسين في الفالنتين: أه يا دبدوبي ياني يا ماما

الستات اليومين دول نازلين تنقير على أنفخ الرجالة ومش عايزين يبطلوا "دوشتون".. قال إيه لازم الدبدوب الأحمر ييجي بمناسبة عيد الحب وإلا فلا
طب يختي فلا وألف فلا.. "وانشالله حتى تفلفلي فلفلة".. أرخص دبدوب في السوق ب500 جنيه.. يعني لو عايز دبدوب عليه القيمة يبقى انت كراجل لازم يكون معاك 1500 جنيه.. كل جنيه ينطح جنيه.
وقال إيه قبلها بيومين تلاقى الحب بيدلدق من الستات.. ومافيش زّغر ولا نّطر ولا زعيق.. وهاتك يا قلوب وأوميشانات على فيس بوك
طب دا شكل ينحب؟!.. بتحبى لحمة راس يا حيلتها؟.. وكل دا علشان تقولى لصاحبتك اللى بتكرهيها وتكرهك أن جوزك الأهبل جابلك دبدوب أحمر بنص راتبه وتنشرى صورة الدبدوب على صفحتك؟
يا ناس حد يزررلى بوقى علشان اسكت.. دا إحنا شعب بنقول عشانا عليك يارب.. يا وليه دا الدبدوب أحلى منك اصلا.. طب لو راجله انشرى صورتك مع الدبدوب وانتى هتشوفى رد الفعل.. ورحمة بقى اللى مشلضمنى ما هتلاقى لايك يوحد ربنا
طب والنبى يا خويا ياللى اشتريت الدبدوب تفهمنى ربنا ينجحلك المقاصد.. ولايمني على إحساسك وانت بتدفع ثمن الدبدوب.. طب سيبك من دى ياحدوقة واوصفلى إحساسك لما المدام أخدت الدبدوب واتفاجئت انها بتبوسك على خدك وبعدها بثوانى تطلب منك تنزل تجيب كيلوا لحمة وشوية خضار علشان الطبيخ بتاع النهارده بمناسبة الدبدوب الجميل
أظن كدا هتقضى باقى الشهر يا مولاى كما خلقتنى.. ياخى توكه.. انا في عرض انطونيو وكليوباترا ارحمونا من الدباديب.. الحب مش بالدبدوب.. الحب بكلمة أو لمسة يا دبدوب
وانتى يا ست يا مفترية.. يارب ما توعى تبوسى.. وتحوسى في الحب وتلوصى.. قال عايزة دبدوب.. وهى يادوب شبه الأنثى الدكر
وآهين عليك يادكر.. والسلام عليكوووووووووووو