دبدوب وفاصوليا وبنت أختى

ماهر عبدالله: هى: كل سنة وانت طيب يا قمرى.. هو: بمناسبة ايه ده؟.. هى: بمناسبة عيد الحب؟.. هو: آه.. وانتى طيبة.. هي: طب بالمناسبة دى مش عايز تقول حاجة؟.. هو: آه.. اجازة نص السنة خلصت وهنبدأ تيرم جديد.. هى (بإحباط): طيب مش هتشترى دبدوب؟.. هو: دبدوب؟ ليه؟ ما عنديش عربية اعلق فيها دباديب.. هى: لأ.. قصدى يعنى تشترى دبدوب وتهديه لحد؟.. هو: آآآآآآآه.. فهمتك.. فعلاً محتاج اشترى دبدوب لبنت اختى عشان كانت لسه قايمة من عيا.. هى: قايمة من عيا؟ طيب بص.. ما نفسكش تمشى على النيل كده.. وتخش سينما.. وتلبس احمر.. وتقول كلام حلو؟.. هو: فعلاً نفسى البس احمر.. واروح الاستاد.. الاهلى وحشنى.. هى: طيب انا نفسى حد يقوللى كلمة حلوة.. ويجيب لى وردة حمرة.. هو: آه والله ومين سمعك.. الواحد نادراً لما يسمع كلمة تبل الريق فى البلد دى.. هى: بلد؟ وانا مالى ومال البلد؟.. هو: آآآه افتكرت.. هقول لك حاجة حلوة اوى تبل ريقك.. كيلو الفاصوليا بقى باتنين جنيه بس.. هى: فاصوليا اما تلهفك.. غور ياض من هنا..