البااارلمنجي: نائبنا ندهته النداهة.. وإحنا عايشين في متاهة

إحنا ما بنتعلمش من التاريخ مهما اختلفت جغرافيتنا.. المواطن في الصعيد هو هو في الوجه البحري.. ممكن ينضحك عليه بكلمتين وهو يعلم أنه بينضحك عليه.. إلا أن قلة حيلته تجعله يتشبث بالوعود الكاذبة أملا في غد أفضل.. وهو ده بقى اللي حصل في دايرتنا بالتمام والكمال.
دايرتنا بها نائبان.. منهم واحد مقضيها تعازي وأفراح وليالي ملاح.. والتانى ما نعرفش عنه حاجة خالص إلا من خلال أخباره في المواقع الإخبارية وبرامج التوك شو اللي بيشجب فيها عدم صبر المواطنين على ظروف البلد، ويدين فيها الإرهاب اللعين اللي بيخّرب في البلد.
سيبك بقى من نائبنا بتاع التعازي والأفراح اللي عايش وسطينا، وآخره يطّلع واحد من القسم ممسوك في خناقة أو ممعاهوش بطاقة.. خلينا بقى في نائبنا اللي ندهته النداهة وعايش في القاهرة وسايبنا في المتاهة.. نائبنا ده بقى كلكم عارفينه نجح إزاي في الانتخابات بعد أن ضرب العائلات ببعضها، ورشح أكثر من منافس من العائلة الواحدة على نفقته الخاصة، ليضرب بعضهم ببعض، وفي اللحظة الحاسمة أعطى كل مرشح من أراجوزات الانتخابات كام ألف جنيه، وجعله يعتذر عن الانتخابات ويعلن تأييده له على الملأ.
فلوس نائبنا التي تم توزيعها هنا وهناك كان لها أثر السحر.. وجعلتكم تصدقون وعوده لكم بأن الدائرة ستصبح فشر باريس؛ لكن وللأسف خدها الغراب وطار.. نائبنا سافر للقاهرة لاستلام كارنيه البرلمان، وحلف القسم ومن يومها لم يعد للدائرة.
نائبنا ندهته النداهة وانشغل بمشاريعه الخاصة، ونجوميته على الفضائيات، وتركنا نعيش في متاهتنا من فقر وقلة حيلة وأسعار تلتهمنا كما تلتهم النار الهشيم.
أنا بقى اللي غايظني إن النائب شايفنا مستعجلين، وشايف الحكومة عاملة اللي عليها وزيادة، مع إن الشعب كله شايف إن الرئيس بيشتغل لوحده، والحكومة نايمة في العسل؛ لكن هنقول إيه.. اشربوا بقى، فهذه هي نتيجة اختياراتكم.
مع تحياتي: أخوكم "نزيه صندوق عبد المتعال الناخب" الشهير بالبااارلمنجي.. نائب ساقط ببرلمان 2016.