نائبنا حصرى.. عايز يحبس مليون مصرى

إحبسنى يامعلم.. قصدى إحبسنى ياسيادة النائب علشان ترضى الحكومة والمسئولين.. وعلشان تدعم مصر وإتلافها يانور العين.. ماهو أنت ماتعرفش نفسك بتمثل مين.. بتمثل الحكومة في البرلمان ولا بتمثل المواطنين؟!
شوفوا بقا يا أهل دائرتى الكرام.. أنا جمعتكم النهارده علشان أنا بصراحة تعبت من تصرفات نواب دايرتنا.. تقولش ندهتهم النداهة ياجودعان! عموما هي دى نتيجة اختياراتكم وتصويتاتكم.. واللى حضر العفريت هو اللى لازم يصرفه.
الباشا البيه سيادة النائب بتاع دايرتنا بيقول للصحافة قال إيه: "ما عنديش مانع من حبس مليون مصرى حال تجاوزهم في حق المسئولين بالدولة".. أي والله "زمبقولكم كدا".
الراجل بيجامل الحكومة ومسئوليها ومحافظيها وموظفيها زيادة عن اللزوم.. أو لزوم التقرب المحموم.. ودا طبعا حال ثلثى نواب دايرتنا اللى مابقناش نهمهم من قريب أو بعيد.. وكأننا لم نكن سببا في وصولهم لمقاعدهم التي تسببت في هذيانهم على حساب همومنا وطموحاتنا لإرضاء الحكومة والمسئولين بالدولة.
يعنى إياك أسمع حد منكم ينتقد أي نائب أو محافظ أو حتى رئيس حى.. وإلا أبلغت عنه سيادة نائب دايرتنا ليقدمه للمحاكمة..
دا سيادة النائب بتاعنا ماعندوش مانع يحبس مليون مواطن نظير إرضاء جلالة مسئولى الدولة.
بصراحة وبجد وبطيب خاطر.. سوف أعطى صوتى لنائبنا هذا في الانتخابات القادمة علشان يفضل على قلبكم.. جايز يحبسكم كلكم وأخلص من همومكم.. وأصبح وحدى في الدائرة وأنتخب نفسى وساعتها سوف أطالب الحكومة بالإفراج عنكم.
فأنتم تستحقون نوابكم الذين لهثتم خلف فتات أموالهم وتركتمونى أنا ابنكم وحامل همومكم.
عموما رمضان كريم وأنا مش هتكلم عن تصرفات باقى نواب الدائرة علشان صيامى ماينجرحش.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.