نائبنا بيتشحتف.. ويحلف إن الحكومة بتتقشف

مابقتش أستغرب أي تصريح من أي نائب.. مابقتش مستنى منهم أي موقف حقيقى في صالح المواطن.. لأ.. دا أنا مابقتش عارف أصلا ما هي مهام نائب البرلمان.. أي والله "زمبقولكم كدا".
وأنا بقى جمعتكم النهاردة يا أهل دايرتى علشان أسمعكم آخر تصريح للسيد نائب دايرتنا الهمام.. قصدى بالسيد اللى انتخبناه علشان يبقى نائب الحكومة الهمام.
طبعا حد هيسألنى يعنى إيه نائب الحكومة الهمام.. ويتجعص لورا ويقولى هع هع هع جديدة دى ياعم البااارلمنجى!
لكن أنا بقى هسألك سؤال أنت وهو وهى وعايز منكم إجابة تثبت عكس كلامى: هو لما النائب بتاعنا يدافع عن الحكومة عمال على بطال كدا.. ساعتها هيبقى نائب الدايرة ولا نائب الحكومة؟!
دا سيادة النائب بيصرح للإعلام والصحافة وبالفم المليان إن الحكومة بدأت في التقشف علشان تكون قدوة للشعب.. أي والله قال كدا.. وقال كمان في تصريح تانى نشرته الصحف إن الحكومة التزمت بالتقشف في موازنتها العامة.
طب أنا بقى عايز أسال نائب دايرتنا الحكومى كام سؤال:
هي الحكومة استغنت مثلا عن مواكب الوزراء اللى بتكلف الدولة ملايين الجنيهات علشان خاطر توفر للشعب؟!
طب هي الحكومة طبقت الحد الأقصى مثلا على أصحاب المرتبات اللى بتوصل ل 200 ألف جنيه وأكتر؟!
طب هي الحكومة خفضت مصاريف بنود الصيانة بالموازنة مثلا ومش هنشوف وزير يجدد مكتبه بمئات الآلاف بمناسبة عيد ميلاد سيادته؟!
طب هي الحكومة أوقفت مكافآت المستشارين اللى هما مش مستشارين ولا حاجة وماليين دواوين الوزارات والمحافظات واللى بتوصل لمليارات المليارت؟!
طب هي الحكومة راقبت الأسواق مثلا علشان تحمى أم المواطن من جشع أم التجار؟!
طب وطب وطب والأسئلة كتير.. لكن سعادت النائب اتعود على التكبير.. ومش هيرد علينا بكتير ولا بقليل.. لأننا كشعب ملناش عنده أي لأزمة أو تأثير.. واعتبرو أصواتكم اللى بخلتم بيها عنى ومنحتوها لسعادته راحت هباء في البلاعات والمواسير.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.