أبين زين

حضرة وزير كهربتنا الله ينور عليك.. ارفع كمان سعر كيلو الكهربا وخليك.. قاعد على الكرسي ومفتَح لنا الشبابيك..
ومحصلينك بتجمع مليونات تديك.. رصيد لمشاريع كبيرة وخطة قد تغريك.. برفع قيمة الفاتورة عشان جناب معاليك.. تحقق اللى انت عايزه وكل شيء يرضيك.. لكن مافيش مرة بتفكر في ناس مساكين.. قاعدين بغرفة في بير سلم ومش قادرين.. على دفع قيمة فاتورة كهرباء آسفين.. لأن دفع الفاتورة يجيب لهم رغيفين.. وما يقدروش يدفعوا إلا بطلوع العين.. حتى الموظف كمان مرتبه جنيهين.. وبيستلف كل شهر يسد دين الدين.. والكل قاعد يقول لك إحنا رايحين فين.. حاسب شوية علينا كلنا عارفين..إن الغلاء مرتفع في كافة الميادين.. والكهرباء شيء ضرورى لحاجة الملايين.. لكن تكون في استطاعة ناس كتير عاطلين... فكل شيء له حساب ويحقق المضامين.. لكن يكون في حدود الكل والعاملين.. ويراعى كل الظروف للناس شمال ويمين.. والمشكلة صعبة لكن كلنا فاهمين.. وأنا قلت كل اللى عندى والجميع سامعين.. وفكروا في الكلام يامسئولين بيقين.